Nasuko gibadlong

Dear Tita Salie,

Have a wonderful day, just call me Gen, single ug dunay hinigugma. Ang akong problema mahitungod sa akong magulang nga akong gikaaway bag-ohay lang.

Naghubo man gud siya atubangan sa iyang anak ug gilainan ko nagtan-aw busa ako siyang gibadlong. Apan nasuko man hinuon siya kay nganong manghilabot ko ug mamadlong ko niya nga manghod ra man ko niya.

Ako lang siyang gibuyag kay tingali usab kun makit-an siya og laing tawo ug ako usab siyang giingnan nga tingali unya kun moabot ang akong uyab. Pero nitubag man hinuon siya nga “ngano magselos ka kun makit-an ko sa imong uyab?”

Nisamot gyud ang among away tungod kay nagkatinubagay man mi, Tita kay  matud niya nga dili siya maminaw kanako. Mora ba og gusto niya nga laing tawo ang mosaway niya. Apan lainan man gud ko, Tita kay ako man siyang igsuon ug dili ko makatan-aw lang kaniya.

Unsa may akong buhaton ako na lang kaha siyang pasagdan? Palihog pasabta ko. Thank you and God bless you always.

* * *

Hello Gen,

Husto ang imong gibuhat ug ipadayon kini kun unsay imong nakita nga dili maayo ayaw pagpakabuta-bungol. Kinahanglan mudaog gyud kanunay ang husto ug maayo. Igo lang nga mosulti ka niya nga dili maayo ang iyang gibuhat apan ayaw na pagtubay sa pagpakiglalis kaniya. Pasagdi lamang kun sa karon dili siya mopatuo kanimo. Apan muabot ra ang panahon nga iyang mahunahuna nga husto ka sa imong pagpamadlong kaniya. Labi na nga duna siya’y mga anak ug sun-on niini ang iyang mga gipangbuhat una pa seguro siya makaamgo nga dili gyud diay maayo ang iyang gihatag nga ehemplo ngadto sa mga bata ug siya na usab unya ang mag-ugtas og badlong kanila.

Ayaw usab kalimti pagmaymay ang mga bata mahitungod sa ilang mga makita. Imong sultihan kun unsay dili maayong buhaton ug nga dili nila sundon ang mga buhat nga dili karapat-dapat. Kun wala’y values ang imong igsuon gamita ang imong pagka-iyaan aron tabangan ang imong mga pag-umangkon.

Padayon sa pagpamadlong ug pagpakabana apan ayaw tubayi kun makiglalis kanimo ang imong igsuon. Pasagdi siya kun dili siya motuo kanimo sa pagkakaron. -- Tita Salie