Lawas hulipan na sa pwesto sa sunod tuig

CEBU, Philippines - Gikatakda nang hulipan sa iyang katungdanan si Lapu-Lapu City Police Office director Sr.Supt. Rey Lyndon Lawas sa sunod tuig.

Si Lawas mibutyag nga nakadawat na siya og kamandoan gikan sa Directorate for Personnel and Research Management o DPRM  sa PNP didto sa kaulohan nga nagpahibalo nga sa sunod tuig sa bulan sa Pebrero gikatakda siyang hulipan.

Si Lawas milingkod sa iyang katungdanan niadtong bulan sa Pebrero tuig 2012 ug base sa lagda sa PNP kinahanglan nga duha lamang ka tuig moserbisyo ang usa ka superintendent.

Apan kung pugngan siya ni Lapu-Lapu City Mayor Paz Radaza dako kini og tabang sa pagpadayon sa iyang mga programa alang sa kapolisan sa dakbayan.

Matud pa ni Lawas andam pa gihapon siya moserbisyo sa Lapulapu apan kung kini tawgon sa iyang serbisyo og promosyon,  isip usa ka buotang sundalo andam usab siya nga mosunod niini. (BANAT NEWS)