Miriam: Enrile may ‘pork’ sa 2014 budget

MANILA, Philippines - May P891-M pork barrel sa 2014 national budget na niratipikahan kamakalawa ng Senado si Senate Minority Leader Juan Ponce Enrile.

Ito ang pag-aakusa ni Senator Miriam Defensor Santiago kung kaya’t sumulat ito kay Department of Budget and Ma­nagement Florencio Abad upang igiit na irekomenda kay Pangulong Benigno Aquino III na i-veto ang P890,886,000 na nakalaan para sa Cagayan Economic Zone Authority (CEZA).

Ayon kay Santiago, bagaman hindi direktang nakapangalan kay Enrile ang nasabing budget kundi sa CEZA, nais nito na matanggal pa rin sa General Appropriations Act ng 2014 dahil ang nasabing economic zone ay pinapatakbo umano ng pamilya ni Enrile at iginiit na ang CEZA ay notorious sa smuggling at illegal gambling.

Idinagdag ni Santiago na kahit pa may Special Provision sa 2014 national budget, maituturing pa ring ilegal at immoral ang pagbibigay ng budget sa CEZA dahil magiging lump sum umano ito na puwedeng gastusin sa discretion ni Enrile.

 Ayon pa kay Santiago, ang ibang economic zones sa bansa ay binibigyan lamang ng nasa P300 milyon hanggang P500 milyon na budget taun-taon pero ang CEZA ay palaging nakakatanggap ng halos P1 bilyon.

Kinuwestiyon din ni Santiago kung ano ang naitutulong ng CEZA  sa ekonomiya ng bansa para bigyan ng malaking budget.