Talisay mipada’g hinabang sa Medellin

CEBU, Philippines - Ang kagamhanan sa Talisay mipadala og sinakong bugas, mga sardinas ug noodles ngadto sa lungsod sa Medellin kagahapon sa buntag.

Si Talisay City Administrator John Yre De los Reyes nga anak ni Mayor Johnny De los Reyes mibutyag sa Banat News nga gipahatud  nila  sa ilang mga  kawani ang maong  mga  hinabang  ngadto  sa  lungsod sa Medellin.

Nasayran  nga ang lungsod sa Medellin nga nahimutang sa amihanan usa sa nakabaton og dakung kadaot sa bagyong Yolanda.

Matud ni Yre nga nakadawat sila og mensahe gikan sa social media ug mga text messages sa cell  phone gikan sa mga nanginahanglan og tabang  didto  sa nahisgutang lungsod.

Matud usab ni Yre nga gawas sa Medellin posibleng ang kagamhanan sa siyudad mohatag usab  og hinabang ngadto sa laing mga lugar nga nakabaton og grabeng kadaot sa bagyo.

Ang mga hinabang nga gipadala  ngadto sa Medellin,  adto  kini  modantol sa buhatan  sa  municipal social welfare sa maong  lungsod.

Gipasabot ni Yre nga angayang ipatigbabaw karon ang pagtinabangay alang sa mga nanginahanglan  sa mga nabiktima sa katalagman.

Nahinumdom  si  Yre nga niadtong milabay’ng linog ang kagamhanan sa siyudad nakadawat usab  og hinabang gikan sa lain-laing lugar.

Karong adlawa ang  mayor gikatakdang moluwat og memorandum nga mag-awhag sa mga kawani sa city hall lakip na sa publiko sa paghatag og mga donasyon alang sa mga grabeng naapektohan sa bagyo. Ang kagamhanan sa Talisay mapasalamaton nga dili daku ang kadaot nga nasinatian sa siyudad atol sa bagyong  Yolanda.

Sa laing bahin, ang siyudad gikatakdang mohatag og mga housing materials ngadto sa mga residente sa Talisay nga nabiktima sa bagyo  kansang  kabalayan  nangaguba .

Sa ulahing talaan sa city social welfare mikabat  sa 56 ka mga balay ang hingpit nga nagusbat  ug 1,136 ang igo  lang  mibahirig.

Matud ni Yre nga matag pamilya nga nalista sa CSW kansang mga balay hingpit  nga  nagusbat   makadawat  og P10,000 nga kantidad sa housing materials samtang ang gagmay  ra  og  kadaot makadawat og P5,000 nga kantidad sa housing materials. (/WC) (BANAT NEWS)