Motor sumalpok, backrider tigok

MANILA, Philippines - Tigok ang isang empleyado matapos sumalpok sa konkretong pader ang sinasakyan nilang motorsiklo na naganap sa Brgy. Molino, Bacoor City, Cavite kamakalawa ng umaga.

Ang biktima ay nakilalang si Julius Canillo, 26, private employee habang sugatan naman ang driver ng motorsiklo na si Billy Ray Martinez, 27, kapwa residente ng Soldiers Hills 4, Brgy. Molino 6, Bacoor City.

Sa imbestigasyon ng pulisya, nabatid na ang insidente ay naganap dakong alas- 4:50 ng umaga habang ang dalawa ay sakay ng Suzuki raider 150, na may plakang 7367-VR at minamaneho ni Martinez nang bigla itong mawalan ng giya at sumalpok sa pader.

Sa lakas ng pagkakasalpok ay tumilapon ang biktima at nakabagok ang ulo sa semento na siyang dahilan ng kanyang agarang kamatayan habang sugatan naman ang kanyang kasama.