Manganakay

Dear Tita Salie,

Good day. Just call me Angel, dalaga pero duna ko’y live-in partner karon.

Kining akong partner karon dunay laing uyab, Tita, nga manganakay. Naglibog lang ko niya tungod kay matud niya nga wala siya’y love sa iyang uyab ug ako gyod ang iyang tinuod nga gihigugma.

Wala ra ba masayod ang iyang uyab bahin namong duha. Dili pa kuno niya puydeng sultihan tungod kay mabdos pa kini, tingali daw unya kun unsa pay mahitabo. Unya nananghid na siya nako nga inigpanganak sa iyang uyab adto una siya mouli sa iyang uyab kay gusto niyang motan-aw sa bata kay iyaha kining anak.

Naglibog lang gyod ko, Tita, kun love ba kaha gyod ko niining akong live-in partner. Wala ko masayod kun unsa gyod ang iyang plano. Unsa kahay maayo nakong buhaton? Palihog pasabta ko. Daghang salamat and more power.

* * *

Dearest Angel,

Nakasabot ko sa imong gibati karon. Anaa kanimo ang pagka-insecure tungod sa iyang sitwasyon. Insecure ka tungod kay duha mo nga anaa sa kinabuhi sa usa ka lalaki. Ug imong nakita nga bisan pa man kun anaa siya kanimo pero ang problema kay may anak na siya sa iyang usa ka hinigugma.

Siyempre, natural lamang nga imo kining bation. Kay bisan ako pa ang anaa sa imong dapit threatening gyod kaayo ang sitwasyon. Anaa sa imong hunahuna nga tingali kun mobalhin ang imong partner didto sa iyang laing uyab tungod kay duna na siya’y anak niini. Dili gyod kalikayan nga mobati ka  og gamay nga kahadlok, kay tingali unya kun sa iyang pag-adto sa balay sa iyang uyab, dili na unya siya mobalik kanimo.

Mao kining sitwasyona nga imong mapamatud-an kun unsa gyod kadako ang iyang gugma diha kanimo. Lig-on ang imong kaatbang o karibal sa iyang gugma. Pero ayaw kahadlok ug dapat open ka o andam ka nga modawat kun unsa may mahitabo.

Kun mobalik siya kanimo proven gyod nga dako ang iyang gugma kanimo. Pero kun adto siya sa iyang anak dawata sa dakong kalipay ang iyang desisyon tungod duha ka tawo ang nagkinahanglan kaniya. Ug duna na siya’y dakong tulobagon sa inahan sa bata kay dako kaayo ang damage nga iyang nahimo niini. Busa ang tanan depende ra gyod kaniya. Ug ayaw siya pugsa nga ikaw ang iyang pilion. -- Tita Salie