Legally Divine

Nahimo na nga abogada apan pabilin nga naglanog-lanog sa kahanginan gumikan sa iyang bokasyon nga makaalagad gihapon sa publiko partikular na sa masa.

Ang 38-anyos nga tri-media personality nga si Atty. Divina “Divine” Marcial-Flores  nisaysay dinhi sa Banat News Hugyaw (BNH) nga  ubay-ubay na ang iyang naserbisyohan gumikan sa paghatag niya og libreng tambag-legal pinaagi sa kolum niya dinhi sa Banat News nga Legal Corner (matag Miyerkules ug Domingo) ug sa programa niya sa dyRC Radyo Calungsod 648kHz. nga Dear Attorney. Nisamot kahugyaw si Atty. Divine human napili isip Best in Public Affairs Program sa  Catholic Mass Media Awards  (CMMA)  2013 ang nahisgutan niya nga radio program.

“Happy ug proud kay ko kay gihatagan og rekognasyon sa CAMMA ang atong programa as Best Public Affairs Program.  I did not expect it because last 2011 my commentary program in dyRC was also nominated pero wa man to mapili,” nagkanayon si Atty. Divine.

Kalit-kalit nga nahuna-hunaan ni Atty. Divine ang pag-umol sa maong programa gumikan kay commentary ug news programs ang gihuptan niya sa una sa dyRC ug iyang gisugyot ngadto sa station manager sa maong istasyon Juniño Padilla nga panahon na nga makabaton sila og linahi nga programa diin makatabang sa mga tawo nga dunay legal problems.

“ Katu nga time bag-o ko nga nag -start sa akong column nga Legal Corner sa Banat News then, nakadawat ko og daghang emails labot sa mga legal problems sa readers  so didto ko nakahuna-huna nga mas maayo mao ni nga format sa program ako i- handle sa radio . Busa June sa niaging tuig, nahimugso ang Dear Attorney nga diin ang mga listeners pwede sila nga makapangutana labot sa ilang mga legal problems,” suma pa ni Atty Divine.

Nagsugod siya sa pagpanibya sa edad nga 19- anyos gumikan kay human siya nigradwar sa kursong Mass Communication didto sa Ozamis City, nitikang dayon siya dinhi sa Sugbo ug una siya nga nasulod isip reporter sa dyRF ug nahimo dayon siya nga news director sa maong istasyon.

Pipila ka tuig sa pagtrabaho niya sa dyRF,napugos siya og resign gumikan kay kinahanglan niya nga mo-concentrate sa pagtungha niya og abogasiya.

Hangtud nga nahimo siya nga abogada ug nahimong kabahin sa pamilya sa dyRC, Banat News ug sa CCTN -47.

Q and A

BNH: Unsa ang gigamit nimo nga formula nga nga ni-click man og maayo ang imong programa nga Dear Attorney?

Atty. Divine: Mobasa gyud ko sa mga bag-ong balaod aron akong ma-discuss sa akong programa ug ma-simplify ang mga provisions aron masabtan sa tanan unya mag research usab ko kay dili biya ta banggiitan nga abogada. Bag-o pa sab ‘ta sa legal profession apan maninguha sab gyud ko nga akong matubag ang ilang mga pangutana may labot sa ilang problemang legal.

BNH:  Ang pagpanibya ba maoy una nimo nga pangandoy?

Atty. Divine: Dili man ni nako ambisyon, pag graduate nako og high school, honestly wa gyud ko kahibalo unsay kurso akong kuhaon. My mother ni-suggest nga mokuha ko og midwifery pero nausab akong plano after I passed the NCEE.  Sa una man gud, kung dili ka mopasar sa NCEE dili man ka makakuha og four year course. So pagpasar nako sa NCEE miadto ko sa Misamis Institute of Techology or MIT in Ozamiz City aron magpa-enrol. I went to the registrar’s office ug ang Registrar nangutana nako kung unsa ako kuhaon nga kurso, I told him, ‘I don’t know’. He suggested to take up Mass Communication, ni-enrol na lang pud ko.

BNH:    Unsa ang rason nga nag-abogada ka?

Atty. Divine: When I was a reporter in DYRF, I was assigned sa Capitol ug sa Palace of Justice. Niadtong higayona , ang kisaw kaayo nga kaso sa  Cebu mao ang Chiong sisters’ case. Gi-assign ko to cover the marathon hearing of that case every afternoon. Didto ko nakakita sa mga abogado nga maglalis unya mo-cite sila og mga balaod nga pulos gyud sila naa sa katarungan and then nasundan sad to sa impeachment trial ni former president Joseph Estrada nga gi-live ang trial,so starring na sad ang mga lawyer busa didto ko naka -decide nga mo- enrol sa college of law sa pamasin nga ma- abogada ko kay wa man gyuy abogado sa among pamilya.  Ang akong parents pulos high school graduate lang so naninguha gyud ko nga ma -abogada ug gikaluy-an sab ta ni Lord.

BNH: Kung ikaw pagawon, mopadayon gihapon ka sa pagpanibya?

Atty. Divine: Sa radio ugTV importante man gyud ang tingog, kay kinahanglan man gyud ta nga mo-report sa atong balita, so kung pananglitan pagawon akong tingog, mopadayon gihapon ko uy. Monindot ra na atong tingog kun magsige na ta og report.

BNH: Gawas sa pagpanibya, unsa pa ang lain nimo nga mga talento?

Atty. Divine: Lately, I discovered nga makamao sad diay ko mo- act, hehehe.  Duna man gu’y  Lenten drama special nga gi- produce sa CCTN , unya ang news and public affairs personnel ang mga artista ug naapil sab tawon ko. Matud pa sa among direktor nga si Mr. Dante Luzon, makamao man sab diay ang taga news nga mo -act so mao na’y akong bag-ong talent karon.

BNH: Kanus-a ka makaingon nga nakontento ka sa imong programa?

Atty. Divine: Kung akong ma -simplify ang mga issue nga akong i- discuss especially ang mga provision sa balaod aron masabtan sa naminaw in layman’s term. Makontento gyud ko kung akong matubag ang ilang mga pangutana may labot sa ilang problemang legal.

BNH: Gawas nga maayo mo-deliver sa impormasyon, unsa pa angayan nga qualities nga naa sa usa ka magsisibya?

Atty. Divine: Kinahanglan makamao ka mo analyze sa issue, makamao ka mopalawom sa imong pangutana.  Imong tun-an unsay impact sa mga ordinaryong tawo sa maong issue ug makamao ka mohimo og angle aron mamahimong interesting ang imong balita.

BNH: Unsa ka importante ang  Press Freedom alang kanimo?

Atty. Divine: Human nakasuway ang Pilipinas sa Martial Law panahon ni kanhi presidente Ferdinand Marcos, I think kitang tanan naka realize kun unsa ka importante ang kagawasan sa Media o sa Press. Ilabi na gyud sa pagpagawas sa kamatuoran, pagpagawas sa mga issue batok sa mga namunuan sa gobyerno ug sa atong mga public officials aron masayran sa katawhan ang tinuod nga panghitabo. Pinaagi  sa press freedom, makaangkon ta og kausaban sama sa nahitabo karon sa pork barrel scam nga napugos gyud ang administrasyon sa pag-abolish niini human masayri sa publiko kun giunsa nila pag-abuso ang pundo nga angay unta sa mga kabus.

BNH: Kung mahatagan ka og tsansa nga mahinabi ang usa ka opisyal sa gobyerno, unsa nga problema ang bout  nimo isugilon kaniya nga angayan hatagan og dinalian nga kasulbaran?

Atty. Divine: Ang problema sa mga public hospitals ug problema sa livelihood sa mga kabus. Daghan sa mga kabus ang nangamatay na lang tungod kay wa madapati og tambal ug tungod sa kakuwang sa kahimanan sa atong mga public hospital. Ikaduha, mao ang problema sa livelihood kay ako nagtuo nga kun ang gobyerno adunay ikahatag nga panginabuhian sa mga ginikanan hayan wa untay mga bata nga gipanggutom karon ug kaminusan unta ang problema sa kakabus.

BNH: Unsay ikasulti nimo sa broadcast industry sa Sugbo?

Atty. Divine: Very competitive and exciting.

BNH:   Unsay imong buhaton sa panahon nga duna sayop nimo nga masulti sa kahanginan?

Atty. Divine: Akong korehian kay wa may perpekto nato di ba?  Matud pa nila, masayup man gani nang kabaw nga upat ang tiil, ang tawo pa kaha nga duha ra, o kun masipyat ko sa paglitok, korehian nako.

BNH: Dili nimo makalimtan nga experience sa imong pagpanibya .

Atty. Divine: Kadtong pag-cover nako sa trial sa kaso sa Chiong sisters ug pag-cover nako sa pag-massacre sa pamilyang Bacolod. Dili gyud ko katulog niadtong mga kasoha kay bisan dili nato sila paryente, I can feel the pain ug sa kapait sa ilang kasinati-an especially sa mga kabanay nga nagbangotan.

BNH: Kataw-anan nimo nga experience sa imong trabaho .

Atty. Divine: Kadtong pagkahulog nako sa hagdanan sa CICC during sa akong pag-cover sa ASEAN Summit. Ang Presidential Security Group kon PSG maoy nagpunit sa akong monitor nga nabungkag ug didto ko matagak sa ground floor nga dunay cocktail party.  Kataw-anan ug makauuwaw kaayo tu nga kasinatian. Napiang gyud ko ato hinungdan nga wa na hinuon ko maka -cover sa meeting sa mga ASEAN leaders kay naglisud na man ko sa paglakaw.

BNH: Dili malikayan nga dunay mga tawo nga mosaway, unsaon ni nimo pagsagubang ang maong pagsuway?

Atty. Divine: Dili nako ibalewala ang ilang mga pagsaway kay usa kana ka paagi aron kita mo –improve. Kung dunay dapat korehian sa akong kaugalingon, akong buhaton ug dili dapat ikasuko kun dunay mo -criticize kanato isip magsisibya.

BNH: Kasuway na ka nga dunay nihulga nimo?

Atty. Divine: Kaluoy sa Dios, wa gyud intawon.

BNH:  Unsa imong tambag sa mga tawo nga ganahan mapareha nimo nga mahimong abogada ug maninibya?

Atty. Divine: Way imposible kun maninguha lang gyud ka. Ang kalisod dili babag sa kalampusan nga gusto nimong kab-uton. Busa bisan tuod kun lisud ang mag-abogado tungod sa kadaghang tun-anan ug mga cases nga ipa digest, mga balaod nga angayang basahon, ayaw gyud og surrender kay kun na abogado mi, way rason nga di sad ka ma- abogado. Kung gusto sab ka nga mamahimong maninibya, pagsugod ray lisud niana. Apan importante gyud ang hardwork ug dedication sa trabaho.

Name:  Divina Marcial- Flores 

Nickname:  Divine

Age:38

Date of Birth:  April 22, 1975

Nationality:  Filipino  

Favorite Song:    Through the Years

Favorite Movie:  Miss Congeniality

Favorite TV Station:  CCTN CH. 47

Celebrity Crush:  Coco Martin

School:  University of Southern Philippines

Course:  Bachelor of Laws

Motto: Strike while the iron is hot.