Administrador midepensa sa iyang papa

CEBU, Philippines - Gidepensahan sa Talisay city administrator ang isyu sa pagbutang og ngalan ni Talisay City Mayor Johnny Delos Reyes sa t-shirt ug sa sakyanan nga  iya  sa kagamhanan.

Kini tungod  kay  giingong kalapasan  kini sa anti-EPAL bill nga miamendar sa "Anti-Signage of Public Works Act.”

Sumala  pa ni Talisay city administrator John Yre Delos Reyes nga dili kalapasan   ang pagbutang sa ngalan ni JVR ngadto sa mga t shirt nga gisul-ob atol sa Civil Service Commission Anniversary sa syudad sa Talisay niadtong miaging semana.

Sigun pa niya  nga wala usab siya’y nakitang kalapasan sa ngalan sa mayor sa duha ka mga bag-ong Innova Patrol Cars nga gihatag  ngadto sa kapolisan sa syudad sa Talisay nga may sulat nga "Johnny V. Delos Reyes Serving Truly the People."

Kini tungod kay ang mayor wala man mag-promote sa iyang kaugalingon  apan igo lamang nagpahibawo sa tinuoray nga pagserbisyo ngadto sa mga taga Talisay.

Gitataw ni John Yre nga dili kini usa ka dakong isyu ug mihulagway sa nahisgutang mga pagsaway nga "exagerated ug gipakapinan."

Kun EPAL man ang maong ngalan sa mayor sa Talisay sa t shirt ug sa patrol car, busa angay  kining  tangtangon, siya niingon nga angayan nga unahon sa paglangkat o pagkuha ang mga dagway ug ngalan sa ubang mga opisyal nga anaa usab sa nagkadaiyang mga lugar sa syudad sa Talisay.

Apan base sa DILG Memorandum Circular no. 2010-101 kon Anti-EPAL nga gidili ang mga ngalan, initial sa ngalan, hulagway o hitsura sa mga government officials sa mga billboard  ug mga signages sa mga programa, proyekto ug mga kabtangan sa kagamhanan.

Si  Mayor JVR amahan  ni John Ere delos Reyes. (/WC) (BANAT NEWS)