Magtiayong senior citizen naluwas sa sunog

CEBU, Philippines - Tungod sa hagdanan naluwas ang magtiayon nga senior citizens sa sunog nga miigo sa alas 11:45 sa miaging gabii sa sitio Nicka, Cabajar Street, barangay Guadalupe sa dakbayan sa Sugbo.

Si Eugenio Banaay,72 anyos nga nahinabi sa Banat News miingon nga kung wala pa ang maong hagdanan siya ug ang iyang asawa nga si Rosario Banaay, 65,  ug ang katabang niya nga si Aileen Zamora hayan napaig gyud sa maong sunog.

Matod pa ni Eugenio nga natulog siya atong higayona dihang gipukaw siya sa iyang katabang kay dako na ang kalayo sa ilang balay.

“Abi man lang to nako og naay nag-away kay nagvideo-k man sila (silingan) naa koy nadunggan nagsige og singgit pagtawag og pulis,” matud pa ni Eugenio.

Migawas siya kuyog ang iyang asawa ug ang iyang katabang dihang nakita niya nga wala na silay kalutsan nagkuha si Eugenio og hagdanan nga gihimong taytayan tabok sa paril sa silingan.

“Mura na ko’g 17-anyos, nikatkat gyud ko, miingon ko sa akong kaugalingon di sa ko magpakamatay,” asoy ni Eugenio.  Hinuon napaso sa iyang dalunggan ug sa buko-buko si Eugenio dihang mibalik kini sa sulod sa ilang balay aron kuhaon sa drawer ang iyang lisensya, apan napakyas siya niini.

Samtang si Renante Luang nga nahinabi sa Banat News miingon nga nagkinantahay sila sa ilang balay dihang may nadungog siya nga piti-piti sa iyang atop sa lima ka higayon ug sa pagtan-aw niya nagbaga na ang sin sa ilahang balay.

“Primero ato usa, dayon nikatulo, pagka-upat kusog na pagkalima piti-piti na man nga nagtulo-tulo na ang kayo unya nagbaga na man ang sin,” matod ni Luang.

Pagkakita ni Luang nga nagkayo ang atop nila misaka siya sa ikaduha nga andana sa ilang balay ug giaswat ang iyang anak padung sa gawas.

Matod pa ni Rose Lidana ang focal person sa Gender Advocacy and Development sa barangay Guadalupe nga 14 ka balay ang apektado diin may 24 ka pamilya ang nagpuyo niini ug mikabat sa 92 ka tawo ang naapektohan sa maong sunog.

Si Kapitan Michael Gacasan sa barangay Guadalupe nga nahinabi sa mga tigbalita miingon nga ipa-ubos sa state of calamity ang lugar nga nasunogan aron makahatag sila og hinabang sa mga apektadong pamilya.

Matud ni Senior Fire Officer 3 Emiliano Dano nga faulty electrical wiring ang hinungdan sa maong sunog ug mikabat sa P250,000.00 ang danyos sa maong sunog. (Bryner Diaz/EIM)

Mga banha nga tambutso idili na sa Cebu City

Gilaraw karon sa siyudad nga i-repeal ang 1964 City Ordinance nga nagmando sa mga nanag-iya og motorsiklo nga mogamit og ‘mufflers o silencers’ sa ilang mga tambutso tungod sa kabanha niini sa kadalanan.

Matud pa ni Councilor Roberto Cabarrubias ang iyang gisugyot nga ordinansa sa konseho niadtong Miyerkules, buot niyang ma-repeal ang City Ordinance No. 465, “requires the use of “a silencer or muffler” for all motor vehicles with exhaust pipes emanating “loud and deafening blasts.”

Sumala pa ni Cabarrubias nga wala pay balaod nga nitutok gyud sa unsaon pagkontrolar ang kabanha sa mga makina sa mga sakyanan o noise pollution gawas lang sa Civil Code nga nagdili “ public nuisance” ug sa Revised Penal Code nga nagdili sa “public disorders.”

Matud pa nga ang kabanha sa mga sakyanan usa sa mga hinungdan nga makasapot sa mga tawo ug usahay makamugna og kasamok. Si Cebu City Mayor Michael Rama miingon nga uyon siya sa pagdili na sa paggamit og mga banha kaayong mga tambutso ilabi na niadtong mga “modified mufflers” nga gituyo og himo aron lang gyud maglanog-lanog ang tingog sa makina sa ilang mga motorsiklo.

“There is a need to make people act responsibly over the use of the property so as not to cause disturbance and annoyance to the public,” matud pang Cabarrubias kinsa misugyot nga idili na ang paggamit og mga “noisy modified mufflers” sa sud sa siyudad.

Ang City ordinance No. 309 o “Anti-Noise Ordinance”, as amended by City Ordinance Nos. 1313, 1705 ug 1898, mikonsiderar nga sala sa balaod ang tuyong pagpakusog sa tingog sa ilang mga makina sa sakyanan: “any person to willfully cause loud and deafening blast of engines…of motor vehicles.”  Ang ordinansa nag-ingon nga gidili ang banha kaayong mga sakyanan o motorsiklo sugod  alas- 7 sa gabii hangtud alas- 5 sa buntag.

Namatikdan ni Cabarrubias nga ang orihinal nga tambutso sa tanang matang sa mga sakyanan gihimo gyud aron dili molanog ang tingog sa makina, apan sa wala matinong rason daghan nang mga sakyanan ilabi na ang mga motorsiklo nga tuyong mitangtang niini aron ilisdan gyud og mga lanog nga tambutso.

“Anything that will already contribute noise is a public and security concerns… It will intrude already the right of an individual to have a peaceful living,” matud pa sa mayor.

Ang ordinansa nga gisugyot ni Cabarrubias gipasa na ngadto sa Committee on Laws pinangulohan ni Councilor Sisinio Andales aron matun-an og maayo. (/EIM) (BANAT NEWS)