Dingdong ipinagdadamot ni Marian kay AiAi

MANILA, Philippines - Ibinuking ni AiAi delas Alas ang pagpapakyut minsan ni Marian Rivera sa boyfriend na si Dingdong Dantes kapag hinihilingan ng babae ang lalaki na buhatin ang isang aqua­rium sa bahay na kanyang nililinis araw-araw. Pero sa totoo lang, kayang-kaya namang buhatin si Yan Yan ang aquarium na ’yon.

“Wala namang dahilan. Kiyeme lang na hindi niya kayang buhatin ang aquarium. Hahaha!” bulalas ni AiAi sa presscon ng movie nilang Kung Fu Divas.

Pero siyempre, inggit-inggitan din ang komedyana sa galing humawak ng relasyon ni Marian, huh! Kahit type rin niya si Dong, alam ni AiAi na wala siyang mapapala kahit naging kaibigan niya ang GMA Primetime Queen.

“Madamot ako eh! Hahaha!” katuwiran naman ni Marian.

Sa Kung Fu Divas, naranasan ni Marian na maging film producer. Itinanggi niyang naimpluwensiyahan siya ng boyfriend na pinasok na rin ang pagiging producer. ’Yun nga lang, ayaw niyang makasosyo ang aktor sa paggawa ng pelikula.

“Ayaw! Ayoko talaga. Hindi. Siguro okay na ’yung relationship namin. May kanya-kanya kaming soap opera. May kanya-kanya kaming ginagawang trabaho.

“Siguro hindi naman sa lahat ng pagkakataon na mag-share kaming dalawa kasi wala na kaming bagong mapag-uusapan eh. Lahat ng aspeto magkasama kaming dalawa.

“Siguro maganda ’yung pagkakataon na nagdi-date kaming dalawa. Meron akong hindi alam sa kanya at meron din siyang hindi alam sa akin. Mas magandang pag-usapan ’yung ganoon. Mas lalo kaming mai-in love sa isa’t isa!” paliwanag ni Marian.

Pero for the record, sa GMA Network lang may kontrata si Marian at hindi sa GMA Films. Ang unang nagtiwala sa kanya ay si Mother Lily Monteverde ng Regal Entertainment, Inc. Kumbaga, bahagi ng kontrata ng aktres ang ginawang Kung Fu Divas na ang Reality Entertainment na ang anak namang si Dondon Monteverde ang may-ari.

After Kung Fu Divas, ang movie naman ng boyfriend na si Dingdong with Bea Alonzo ang next offering ng Star Cinema sa 20th anniversary ng film company.