Angel interesado gihapon sa Darna

CEBU, Philippines - Tsika pa ni Angel Locsin nga kung mahatagan siya og tsansa sa ABS-CBN, interesado gihapon siya nga modala sa karakter ni Darna. Kahinumduman  nga si Angel maoy nidala isip Darna sa dihang gipasalida pa kini sa GMA-7 niadto. Nasayran nga mogama usab og laing remake ang ABS-CBN sa Darna.

Pakpak Toni Bennett!

Mga iladong personalidad ang nilantaw sa concert sa international singer nga si Tony Bennett sa miaging gabii sa PICC Plenary Hall ug pipila niini mao sila si Mark Bautista, Ronaldo Valdez, Janno Gibbs, Senator Bongbong Marcos, Jose Mari Chan,Ricky Lo,  Vice President Jojo Binay, ug Senator Nancy Binay. Nakadawat og standing ovation si Tony gumikan kay bisan edad-edaran na, nagpabilin nga hugyaw ang iyang tingog.

Mark andam na maghubo

Gipahibalo ni Mark Bautista nga andam na siya nga magpa-sexy atubangan sa kamera kung gikinahanglan kini sa pipila nila ka eksena ni Bella Padilla sa umaabot nila nga indie project. Suma pa ni Mark nga andam siya mobuhat niini basta dili lang law-ay ang presentasyon.

Hearing wala madayon

Sa ikaduhang higayon, wala na usab madayon niadtong Miyerkules ang hearing kalabot sa gipasaka nga libel case ni GMA Films President Atty. Annette Gozon-Abrogar batok kang Sarah Lahbati sa Makati Regional  Trial Court branch 59. Giingong naa pa’y mga motion nga maoy unahon pagsulbad.

Sorpresa

Naukay pag-ayo si Angelica Panganiban gumikan kay kanunay gihapon siya nga isorpresa sa iyang uyab nga si John Lloyd Cruz busa bation gihapon siya og kakilig niini.  Matud pa sa aktres nga dunay mga panahon nga dunay kalit nga maabot nga buwak sa iyang balay ug kini pinadala ni Lloydie.

Suwerti nga singsing

Gihatag ni Kris Aquino ang iyang aquamarine ring ngadto sa iyang higala nga si AiAi delas Alas. Suma pa ni Kris nga makatabang kini sa pagbanlas sa mga negatibong butang nga giatubang sa iyang higala.

Top 8

Magtigi na karong Domingo ang top 8 contestants sa The Voice of the Philippines  nga naglangkob nila ni  Thor ug  Janice sa  Team Apl.d.Ap, Myk ug Paolo sa Camp Kawayan ni Bamboo, Klarisse ug Morisette sa Team Sarah Geronimo, Mitoy ug  Radha sa Team Lea Salonga. Magtigi ang nahisgutang walo ka finalists karong Domingo sa Newport Performing Arts Theater sa Resorts World Manila.

Martin nagpatabang ni Arnold

Gihinayan si Martin del Rosario sa dagan sa iyang career busa nidangop siya kang  Arnold Vegafria aron maoy mo-manage kaniya. Giklaro hinuon sa aktor nga co-managed gihapon siya sa Star Magic. 

Limitado ang trabaho

Limitado na lang ang dawaton nga  trabaho ni Melissa “Melai” Cantiveros  gumikan sa iyang pagsabak. Temporaryong mopahuway si Melai sa showbiz sa higayon nga modako na og maayo ang iyang tiyan. (Sanden J. Anadia)