MMDA member huli sa extortion

MANILA, Philippines - Naghihimas ngayon ng rehas na bakal ang isang  tauhan ng Metropolitan Ma­­nila Development Autho­rity­ (MMDA) matapos na arestuhin­ sa isang en­trap­ment operation sa Sta. Mesa, Maynila.

Sinampahan ng 11 counts ng kasong robbery extortion sa Manila Prose­cutors  Office si Benjamin Capili, 44, ng no. 616 Gerona St. Tondo, Maynila.

Sa report na tinanggap ni Chief Insp. Bernabe Irinco, Jr., hepe ng MPD-MASA, nagtungo sa kanyang tanggapan ang ilang  vendor upang ireklamo ang umano’y  panghihingi  sa ka­nila ng isang nagpakilalang  taga MMDA.

Bunsod nito, agad na  inutos ni Irinco ang  entrapment operations na pina­ngunahan naman ni PO3 Antonio Rigor at dalawang   miyembro ng Hawkers.

Dakong alas-6 ng gabi  noong Huwebes nang pumoste sa R. Magsaysay Blvd. ang mga pulis at nakita ang pagdating ng suspect na si Capili.

Agad na dinamba ng mga pulis si Capili at dinala sa MASA station kung saan positibong itinuro ng mga vendors na nanghihingi sa kanila ng P20 at P50 tuwing Huwebes.

Dito na sinabi ng mga vendors na hihingan sila ni Capili ng nasabing halaga upang makapagtinda sa side­walk sa panulukan ng R. Magsaysay at V. Mapa St. sa Sta. Mesa, Maynila.