PMODA quarterfinals sugdan ugma
CEBU, Philippines - Nagpanikad na ang upat ka teams nga moduwa sa quarterfinals "best-of-three" series sa Pulpogan Motorcycle Owners and Drivers Association (PMODA) Conference 3 Habal-Habal Leg nga sugdan ugma didto sa Pulpogan gym sa Consolacion.
Tataw nga sikit ug init ang maong aksiyon kay ang matag koponan buot man moangkon og daog aron unang makabentaha sa series.
Sa pasiunang duwa nga gikatakda sa alas-4 sa hapon, ang Ghost Riders nga gipaluyohan ni Allary 'Al-Al' Pepito Alegado makigbangga sa Eskina Riders ni team manager Ingkoy Along.
Ang Ghost Riders maghangad sa abilidad sa tulo nila ka alas nga silang Roel Bangka, Elizar Personal ug Enrico Rosales.
Samtang itugyan sa Eskina Riders ang ilang pagsalig ngadto nilang Joseph Lleve, Brian Villamor ug Amay Cabilan.
Sa main game sa alas-5:30 sa hapon, ang Calamarez Riders ni team manager Marcelo Avelardo nga nagsalig sa tandem nilang Jessel Gungob ug Mario Pepito makigsangka sa T.D.M.U. Riders.
Mismo ang team manager sa T.D.M.U. nga si Romeo Gallardo maoy mangulo sa koponan uban ni William Alegado.
Ang modaog sa series maoy moabante sa semifinals uban sa topseed Fooda Riders ni team manager Jojo Colita ug second-seed District 4 Riders ni Luther Hopida.
Ganting salapi ug bugas ang ihatag ngadto sa top three winners ning maong torneyo nga gipaluyohan ni Pulpogan Brgy. Capt. Roger R. Linaboc uban sa iyang mga konsehales Avelino G. Bihag, Adrian G. Isoto, Geroncio M.
Azucenas ug Raymond P. Villanueva.
Ang liga suportado sab nilang municipal councilor Julius P. Alegado, Poblacion Oriental councilor Paul Alelu Q. Flores ug community stakeholder Charle R. Mendoza.
- Latest
