Pagdili sa pagbaligya og narehistro nga sim giduso sa Mandaue

CEBU, Philippines — Gipasar sa unang pagbasa sa Mandaue City Council ang gisugyot nga ordinansa nga magdili sa pagbaligya, pag-apod-apod, pagpalit, pagbalhin, ug pagpanag-iya sa mga pre-registered Subscriber Identity Module (SIM) cards aron mapalig-on ang pagpatuman sa SIM Registration Act.

Si Konsehal Jennifer Del Mar maoy nagduso niini pinaagi sa Draft Ordinance No. 102-2026, nga nagtumong sa pagpalig-on sa Republic Act No. 11934 pinaagi sa pagbutang og lokal nga mga regulasyon ug silot batok sa mga indibidwal ug establisamento nga nalambigit sa ilegal nga pagbaligya sa mga pre-registered SIM cards sulod sa Mandaue City.

“Atong gi-regulate ang pagbaligya aning mga pre-registered nga SIM cards, para dili siya magamit sa mga naay purpose mubuhat og daotan,” matod pa ni Del Mar.

Gisunod sa maong ordinansa ang nasudnong balaod apan gidugangan kini og mga probisyon nga espesipiko alang sa Mandaue City, lakip na ang pagsilot sa mga mopalit og pre-registered SIM cards.

Matod pa sa konsehal, nakadawat na siya og mga report nga adunay namaligya og pre-registered SIM cards sa siyudad.

Gipasabot usab niya nga ang pagpalit og pre-registered SIM card mahimong timailhan nga adunay daotang katuyoan ang usa ka tawo.

Gibase sa gisugyot nga ordinansa ang police powers sa lokal nga kagamhanan ubos sa Local Government Code, nga nag-ingon nga gikinahanglan ang mas lig-on nga lokal nga pagmonitor ug pagpatuman aron mapugngan ang cybercrime, online scams, identity theft, fraud, ug uban pang krimen nga gigamit ang mga SIM card nga narehistro sa dili tinuod nga identidad.

Ang ordinansa maglangkob sa mga public telecommunications entities, ilang mga awtorisadong dealers, distributors, retailers, agents, ug resellers, ingon man sa mga negosyo, online sellers, ug mga indibidwal nga nalambigit sa pagbaligya, pag-apod-apod, o pagpalit og SIM cards sulod sa Mandaue City.

Lakip sa mga gidili nga buhat mao ang pagbaligya o pag-apod-apod og pre-registered o na-activate na nga SIM cards; pagtabang sa pagparehistro sa SIM gamit ang peke o gikawat nga identidad; tinuyo nga pagpalit og pre-registered SIM cards; pagpanag-iya niini alang sa pagbaligya pag-usab; pagbalhin sa pagpanag-iya sa narehistrong SIM nga wala motuman sa nasudnong regulasyon; ug pagdumili sa inspeksyon sa mga awtorisadong personnel sa siyudad.

Ang pagpatuman sa ordinansa ipahigayon sa Business Permit and Licensing Office (BPLO) sa koordinasyon sa Mandaue City Police Office (MCPO), National Telecommunications Commission (NTC), ug Department of Information and Communications Technology (DICT).

Kon mapasar sa ikaduhang ug katapusang pagbasa, ang mga negosyo, dealers, distributors, retailers, ug resellers nga mapamatud-ang nakalapas sa ordinansa makamulta og P5,000 ug dayong suspensyon sa ilang business permit, nga mahimo pang mabawi human sa due process. Samtang ang mga indibidwal nga pumapalit, nagbaligya, o nagkupot og pre-registered SIM cards alang sa pagbaligya pag-usab mahimong silotan og P5,000 nga multa, prisohon sulod sa 30 ka adlaw hangtod unom ka bulan, o pareho, depende sa hukom sa korte, gawas pa sa posibleng kasong mahimong ipasaka ubos sa Republic Act No. 11934 ug uban pang may kalabutan nga mga balaod. — /MEL (BANAT NEWS)