Lady Snipers triumph in Camotes caging

CEBU, Philippines – Mikulit dayon og daog ang team Pañeros ni playmaker Jun Felicitas human ilang gipukan ang Mt. Zion, 77-69 sa pagsugod sa ikatulong season sa 2009 Integrated Bar of the Philippines (IBP) basketball tournament niadtong Domingo didto sa Capitol Parish gym sa dalan Escario, ning dakbayan.

Si Felicitas maoy mipahiluna sa dagan sa duwa uban sa abag nilang Barry Buris, Dennis Aliño ug Nilo Balorio.

Si Buris maoy nangu sa Pañeros pinaagi sa iyang 12 puntos, samtang sila si Felicitas, Aliño ug Balorio midugang og 10 puntos matag usa.

Sila si Ferdie Riveral ug Art Flores maoy nangu sa Mt. Zion nga mirehistro og 14 puntos matag usa.

Sa lain pang mga duwa, ang Super Idols ni coach Atty. Bong Pepito milubong sa Opascor Eagles sa iskor, 87-53, ang Casino Rubbing Alcohol midaog batok sa Pecandela Law Firm sa iskor nga 56-52 ug ang YLAC Team milubong sa Rama Boys, 69-45.

Si Benjo Santiago maoy nangu sa Super Idols human   mihakot og 27 puntos, gisundan ni Ramsey 'El Presidente' Quijano nga miamot og 10 puntos.

Sila si Dave Godornes mibugha og 12 puntos ug si Al Lagahit mihipos og 11 puntos alang sa Opascor.

Sa laing bahin, si Richard Bauzon mao sab ang nangu sa   Casino sa iyang 16 puntos.

Ang pilderong Pecandela Law Firm gipangulohan ni Jessie Capoy sa iyang 13 puntos, samtang sila si Mark Gamallo ug Sam Malazarte midugang og 10 puntos matag usa.

Ang YLAC gipangulohan ni Val Ligutan, kinsa mipabuto og 22 puntos. – THE FREEMAN