Oden dili pa

Ang top draft pick sa Portland Trail Blazers nga si Greg Oden nagkinahanglan og operasyon sa iyang tonsil og gipanglantawan nga dili na makapakita og aksyon sa nahabiling mga duwa sa Trail Blazer sa summer league.

Human nakadawat og ESPY awards didto sa Los Angeles, mopaubos siya og tonsillectomy karong Sabado didto sa Vancouver Clinic, Washington, mao kini ang gipahibalo sa iyang team management.

Ang hingpit nga pagpaalim gibanabana nga molungtad ngadto sa duha o tulo ka semana.

"Greg felt that this was the right decision to make in the interests of his health, and we support that decision 100 percent," matud pang Trail Blazers general manager Kevin Pritchard. "The sooner he gets the procedure done, the sooner he can get back on the court at full strength."

Si Oden, 7-foot center kinsa nakaduwa og usa ka season sa Ohio State, maoy No. 1 pick sa NBA draft niadtong Hunyo 28 ning tuiga.

Sa iyang unang duwa sa summer league, si Oden nakahipos og 6 puntos ug duha ka rebounds sa wala pa siya ma disqualified dihang nakatali og 10 ka fouls nga maoy maximum nga gitugot  sa summer league. Ang Blazers napilde ,66-74, batok sa Boston Celtics.

Sa iyang ikaduhang duwa tali sa Dallas,  si Oden nitapos og 13 puntos, 5 ka rebounds ug 9 ka  fouls. Ang Mavericks nidaog 72-68.

Tungod sa himoong operasyon, dili pa makaduwa  si Oden karong Domingo batok sa Seattle Supersonics kanus-a iya untang makabagat ang No. 2 pick nga si Kevin Durant.

Dugang pa niini, dili usab makatambong si Oden sa U.S. Senior National Teams minicamp karong Hulyo 20-22 didto sa Las Vegas. Hinoon, imbitado siya sa pagsalmot sa training sa mga Americans karong Agosto sa dili pa ang FIBA Americas tournament kong hingpit na maayo ang iyang operasyon.