Lapu-Lapu mopatuman og four-day workweek

CEBU, Philippines — Magpatuman og temporaryong upat ka adlaw nga trabaho o four-day workweek matag semana ang pipila ka opisina sa Kagamhanan sa Dakbayan sa Lapu-Lapu isip lakang sa pagdaginot sa gasolina ug enerhiya taliwala sa pagsaka sa presyo sa lana ug mga limitasyon sa suplay sa kuryente.

Gipahibalo sa city government ang maong lakang niadtong Huwebes bisan og epektibo na kini sukad niadtong Oktubre 26, 2026 ubos sa Executive Order No. 2026-74 nga gipirmahan ni Mayor Ma. Cynthia “Cindi” King-Chan niadtong Oktubre 20. Gipahinumduman ni King-Chan ang mga Opongano nga adunay transaksiyon sa city government nga susihon una ang schedule sa operasyon sa mga opisina sa dili pa moadto.

Ubos sa maong mando, ang mga opisina nga sakop niini mag-abli gikan alas 7:30 sa buntag hangtud sa alas 6:00 sa gabii, Lunes hangtud sa Huwebes nga adunay 30 minutos nga pahulay alang sa paniudto.

Apan magpabilin sa ilang naandang lima ka adlaw nga schedule gikan alas 8:00 sa buntag hangtud sa alas 5:00 sa hapon, Lunes hangtud sa Biyernes ang mga opisina nga naghatag og importanteng serbisyo ug direktang serbisyo ngadto sa publiko.

Lakip niini ang City Health Office, Lapu-Lapu City Hospital, City Social Welfare and Development Office, Disaster Risk Reduction and Management Office, City Traffic Management System, drainage ug road maintenance team sa City Engineering Office ug City Environment and Natural Resources Office.

Magpabilin usab sa regular nga schedule ang City Civil Registrar, dog impounding ug abattoir operations sa City Veterinarian, Office of the Market Administrator ug Solid Waste Management Office.

Samtang, ang upat ka adlaw nga work week ipatuman sa mga administratibo ug uban pa’ng opisina lakip ang Office of the Mayor, Office of the City Administrator, Office of the Vice Mayor, Sangguniang Panlungsod, City Treasurer, City Budget Office, Business Permits and Licensing Office, Tourism Office ug Public Information Office. Matud ni King-Chan nga gituyo ang pag-usab sa schedule aron mamenosan ang adlaw-adlaw nga pagbiyahe sa mga empleyado, panginahanglan sa gasolina ug gasto sa transportasyon ingon man ang konsumo sa kuryente pinaagi sa paghiusa sa operasyon sa mga opisina.

Gitugotan usab ang mga hepe sa mga opisina nga sakop sa maong mando nga magkinahanglan sa pipila ka division, unit o empleyado nga mosunod gihapon sa regular nga oras sa trabaho kon gikinahanglan apan kinahanglan kini nga aprobahan sa mayor. (BANAT NEWS)