113 ka punoan sa kahoy girekomenda nga putlon

CEBU, Philippines — Moabot ngadto sa 113 ka punoan sa kahoy diha sa daplin sa Butuanon River sa Barangay Bacayan ang girekomenda nga putlon ug ibalhin alang sa Improvement Flood Mitigation Structures project sa Department of Public Works and Highways (DPWH).

Base sa mga dokumentong gisumite sa ahensiya ngadto sa konseho giingong 67 ka kahoy ang girekomendar nga putlon samtang 46 ang ibalhin ngadto sa laing lugar.

Niadtong Hulyo 15, 2026, giendorso ni Konsehal Joel Garganera, tsirman sa Committee on Environment ang inspection report sa Cebu City Environment and Natural Resources Office (CCENRO) ngadto sa Sangguniang Panlungsod aron suportahan ang aplikasyon sa DPWH-Cebu City District Engineering Office.

Nagpahigayon ang CCENRO og ocular inspection niadtong Hunyo 10, 2026 human madawat ang aplikasyon sa DPWH.

Nasuta sa inspection team nga ang 113 ka punoan sa kahoy anaa sulod sa project area ug maapektohan sa pagtukod sa flood mitigation structures.

Ang maong mga kahoy gilangkuban sa gmelina, acacia, mahogany, mangga, sambag, pomelo, nangka, mansanitas, kalachuchi, robles, tambis ug uban pa.

Samtang ang ubang lumad nga kahoy sama sa narra, balete, santol ug talisay girekomenda nga ibalhin.

Apan adunay pipila ka dagkong kahoy nga kinahanglan usab putlon tungod sa ilang nahimutangan.

Matud sa CCENRO nga dili sugdan ang pagpamutol sa mga kahoy kong walay resolusyon gikan sa konseho ug permit gikan sa Department of Environment and Natural Resources (DENR).

Gikinahanglan usab nga magtanom ang ahensiya og 100 ka punoan alang sa matag usa ka kahoy nga putlon ug magbutang og P10,000 nga bond matag kahoy nga ibalhin aron masiguro ang kalamposan sa transplanting sulod sa duha ka tuig.

Ang proyekto kabahin sa 2026 infrastructure program sa DPWH ug naglakip sa rehabilitasyon sa flood mitigation structures sa Butuanon River.

Niluwat usab ang Environmental Management Bureau og Certificate of Non-Coverage alang sa proyekto, apan nipahimangno nga kinahanglan gihapon motuman ang DPWH sa tanang environmental laws ug permit requirements.

`Niluwat usab og certification ang Barangay Bacayan nga wala kini mosupak sa plano sa pagtangtang sa mga kahoy basta matuman ang tanang gikinahanglang resikitos ug giya gikan sa DENR ug ubang ahensiya sa gobiyerno.

Apan atol sa sesyon kagahapon wala una aprobahi sa Committee on Environment ang gisugyot nga resolusyon human nga nihangyo si Garganera sa DPWH nga mosumite una kini sa giusab nga proposal diin langkuban lang sa 380 metros ang flood mitigation project ug dili ang kinatibuk-ang 2-kilometro.

 Dugang ni Garganera nga tungod sa pag-defer sa maong resolusyon posible nga mokunhod ang gidaghanon sa mga kahoy nga girekomendar nga putlon ug ibalhin. BDB BANAT NEWS