Maikog sa ex

Maayong adlaw, Tito Miguel.

Ako diay si Jimmy, 27 anyos, taga Barangay Apas, Cebu City. Adunay usa ka babaye nga kaniadto akong hinigugma. Tawgon nato siya sa ngalan nga Dina. Dugay na kaming nagbulag tungod kay wala na gyud gyud mi nagkasinabot tungod sa iyang pagkaselosa.

Apan para kang Dina, mura’g wala pa gyud siya nakamove on. Bisan pila na ka buwan na ang nilabay, sige gihapon siya’g panawag ug pagpadala og mensahe nako. Kung dili ko motubag, mangutana siya sa akong mga higala kung asa ko ug unsa akong gibuhat. Usahay, mokalit na lang siya’g adto sa among balay aron makigkita nako nga wala man lang nagpahibalo. Nasulayan na nako nga istoryahan siya sa malinawon nga paagi ug gipasabot nga wala na gyud koy plano nga makigbalik. Apan sa matag higayon nga akong buhaton kini, mohilak siya ug moingon nga dili niya kaya nga mawala ko sa iyang kinabuhi. Tungod sa akong kaluoy, dili pud nako siya hingpit nga ma-ignore.

Mao kana ang akong dakong problema, Tito Miguel. Dali rakay ko malouy. Wala na gyud koy pagbati nga sama sa una. Laktod pagkaistorya, maikog ko niya. Unsay angay nakong buhaton nga makaikyas ko niini situations? — Jimmy

* * *

Jimmy,

Kun imo gihapon siya pagbigyan tungod sa kaluoy, samot nga imo siya nga gipadahom nga duna pa’y paglaom magka-uli mo. Tungod lagi ka’y nahigugma pa siya kanimo, iyang sabton nga gugma ang tanan matang sa imong pagtagad niya. Dili na niya makita nga kaluoy lang, para niya gugma lang gihapon.

Tabla ra nga imo siyang gipaasa sa wala. Busa undangi na ang pag-atubang niya. Putla tanan ninyo nga komunikasyon. Kun makalusot gihapon nga makakontak nimo, ayaw tagda, ayaw tubaga. Kay sa gamay nga atensyon nga imong ihatag niya, dako na kaayo na para niya.

Mora ra gud na’g naa kay gikaibgan, tanan niya buhaton hatagan nimo’g malisya. Nipahiyom lang, abi nimo kanimo sab giganahan. Nitimbiya lang, abi nimo niingon na’g gihigugma ka niya. Busa balikon ko, panirado’g pangandado. Ayaw na siya pasudla balik sa imong kinabuhi, maski isip higala lang. Timan-i, labaw pa sa higala iyang gusto nimo. Pero di na man kaha ni nimo mahatag niya, ayaw na siya ipaasa pa.

Kun kalit moabot sa inyong balay, pabalibari nga wala ka o ipaingon nahinanok ka. Pero’g nakit-an na ka, ingna dayon molakaw na ka. Sa maong paagi makasabot siya nga para nimo tapos na mong duha. Bahala’g magbalik balik, maluya ra gihapon na, labi na’g makaamgo nga di na mausab imong hunahuna. — Tito Miguel

Magpatambag ka? Ipada kang Tito Miguel: 0991-318-9366