Chan nihangyo og pakig-alayon sa MCWD para sa serbisyo sa tubig

CEBU, Philippines — Nagkasabot ang siyudad sa Lapu-Lapu ug ang Metropolitan Cebu Water District (MCWD) nga palig-onon ang ilang koordinasyon aron mapalambo ang serbisyo sa tubig ug masiguro ang hapsay nga pagpatuman sa mga proyekto sa imprastraktura sa tubig sa siyudad.

Atol sa tigum sa Infrastructure and Marketing Development Committee, gipadayag ni Mayor Ma. Cynthia “Cindi” King-Chan ang panginahanglan sa regular nga koordinasyon tali sa city government ug MCWD aron matubag ang mga isyu sa suplay sa tubig ug mahan-ay ang umaabot nga mga proyekto sa imprastraktura.

Matod ni King-Chan, tumong sa siyudad nga masiguro ang igo ug kasaligan nga suplay sa tubig, ilabina sa mga barangay sa Marigondon ug Suba-Basbas diin padayon nga misaka ang panginahanglan sa tubig.

Gidawat usab sa mayor ang plano sa MCWD nga palapdan ang water distribution system niini ug gihangyo ang water district nga isumite ang ilang mga prayoridad nga proyekto ubos sa lima ka tuig nga development plan.

Matod niya, makatabang kini aron maangay sa siyudad ang mga road works ug iskedyul sa excavation aron malikayan ang pagsumpaki sa mga proyekto ug maminusan ang kahasol sa mga motorista ug residente.

Gihangyo usab sa mayor ang tabang sa MCWD sa pagsulbad sa mga gitaho nga water leaks sa nagkadaiyang bahin sa siyudad aron maminusan ang pagkawala sa tubig ug mapalambo ang serbisyo ngadto sa mga konsumidor.

Atol sa maong tigum, gipresentar sa MCWD ang kasamtangang water supply system niini ug ang mga gisugyot nga proyekto sa imprastraktura alang sa Lapu-Lapu City.  Sumala sa MCWD, ang gibanabana nga adlaw-adlaw nga panginahanglan sa tubig sa siyudad miabot na sa 147,413 cubic meters, nga nagserbisyo sa 18,649 ka service connections, lakip ang 14,872 ka residential accounts ug 3,777 ka commercial ug uban pang non-domestic connections.

Gipadayag usab sa MCWD ang mga plano alang sa transmission ug distribution pipeline projects nga nagtumong sa pagpalambo sa suplay sa tubig ug pagpalapad sa serbisyo ngadto sa mas daghang panimalay. MEL BANAT NEWS