Pagkaon, sinina, tubig, gamit-kusina maoy labing gikinahanglan

Mga pagkaon, mga sapot, banig, habol, kaldero, plato, baso ug uban pang galamiton alang sa biktima maoy labing gikinahanglan sa 3,880 ka mga lumolupyo nga nabiktima sa sunog sa barangay Mantuyong ug Guizo sa dakbayan sa Mandaue.

Kini ang gipadayag ni Mandaue City Social Welfare and Development Chief Caridad Comaingking nga gikahinabi sa Banat News kagahapon.

Matud pa niya nga si Mayor Thadeo Ouano ang mipahiluna karon sa mga biktima sa mga dapit nga maoy ilang temporaryong pinuy-anan nga naglakip sa Mandaue City Comprehensive National High School, (MCCNHS) City Central School sa Centro, Tipolo National High School gym, kanhi display center sa Norkis Trading sa Looc ug uban pa.

Dugang pa niya nga ilang gisiguro nga mahiusa sa pagpahiluna ang mga biktima sa mga evacuation center aron sa ingon sayon ang pag-apod sa mga pagkaon ug panginahanglan.

Sa pamahayag ni Filomina Mayol usa sa mga social welfare officer sa dakbayan mitug-an nga dunay mga biktimang dili gustong adto magpundo sa evacuation center tungod kay nahadlok nga mapulihan ang ilang pwesto.