Bata mibaligya armas sa Army gisikop

Puwerting dimalasa sa usa ka minor de edad nga buot mobaligya sa iyang armas apan ang iyang gitanyagan usa diay ka sundalo nga sakop sa Philippine Army nga nagbase diha sa Minglanilla, Cebu kinsa daling nakapanawag og polis nga miresulta sa pagkasikop kaniya.

Nahitabo kini pasado alas 10 sa miaging buntag diha sa Sitio Tagaytay, Vito, sa sama nga lungsod.

Ang nadakpan kinsa gitanggong na karon sa Minglanilla Police Station giila nga si Joel (apilyedo gipugngan) 17, ulitawo ug residente sa Phase 4, Saint Jude, Bulacao, ning dakbayan.

Si Joel naaktuhan ug nakuhaan sa iyang posisyon og usa ka .22 paltik rebolber ni Chief Insp. Joseph Mangaron ug PO3 Allen Garciano kinsa daling nakatubag human madawat ang maong report.

Segun sa report sa kapolisan nga midangat sa Cebu Provincial Police Office, si Joel nagdala sa iyang armas ug iyang gitanyagan si PFC Junjun Sumagaysay sakop sa 7th Infantry Batallion sa Philippine Army nga paliton ang dala niyang armas

Apan si PFC Sumagaysay mibalibad ug mitawag hinuon sa kapolisan ug nagpahibawo kabahin sa transaksyon sa gikatahapan nga miresulta sa pagkasikop niini.

Si Joel kasamtangan karon gitanggong sa detention cell ug gipasakaan na kini'g kaso sa kalapasan sa paghupot og dili lisensyadong armas ug sa gipatuman karon sa Comelec gun ban.