Bawas presyo ng diesel, posible sa susunod na linggo

MANILA, Philippines — Malaki umano ang tiyansa na magkaroon ng rollback sa presyo ng diesel sa susunod na linggo, sa kabila ng patuloy na tensiyon sa Gitnang Silangan.

Ito ang inihayag kahapon ni Department of Energy (DOE) Oil Management Bureau Director Rino Abad, maaaring magkaroon ng pababang price adjustment sa susunod na linggo, base na rin sa apat na araw na trading sa Mean of Platts Singapore.

Sinabi ni Abad na ang presyo ng diesel ay maa­aring bumaba ng mula P2.00 hanggang P3.00 kada litro. Habang maa­aring manatili ang presyo ng gasolina o bumaba ng hanggang P2.00 kada litro.

Ang presyo naman aniya ng kerosina ay maa­aring hindi rin magkaroon ng pagbabago o ‘di kaya ay bumaba ng hanggang P0.50 kada litro.

Ipinaliwanag ni Abad na ang panibagong tensiyon sa pagitan ng Estados Unidos at Iran ay may bahagya lamang na epekto sa presyo ng mga produktong petrolyo.

Nilinaw rin ni Abad na base sa monitoring ng DOE, ang kasalukuyang presyo ng langis ay nasa pagitan ng P70 hanggang P90 kada litro, at hindi dapat na lalampas ng P100 kada litro.

Tiniyak niyang patuloy na tinutunton ng DOE ang mga gasolinahan na guma­gawa ng hindi otori­sadong pagtataas ng pre­syo upang kontrahin ang rollback.

Ang pinal na adjustment sa presyo ng mga produktong petrolyo ay karaniwang iniaanunsiyo sa araw ng Lunes at ipinaiiral naman kinabukasan.