Ang lolo kong si Binog

Kining akong lolo, idol gyud sa iyang mga apo;

balak, dula-pulong, kahibulongang hitabo;

pirming mapatik sa mga mantalaan sa sugbo;

ug masibya usab kini sa estasyon sa radio;

tungod kay siya sa LUDABI miyembro.

Sa otsienta'y dos nga pangedaron,

kalooy sa ginoo abtik-abtik pa karon;

pero usahay dili malilong ang pagkamalimtanon,

bisan sa sige'g himo'g dulapulong ug mga sugilanon;

antyohos nga naa ra sa iyang ulo, nangita gihapon.

Si Mariano Manus Sr., inila usab nga pintor,

bani sa saging ang paleta, mixer ang tinidor,

makinilya, lapis, pentel pen iyang friends 'indoor';

pero mugawas ang pagkamambabalak ilabi na ug naay 'visitor',

kauban sa iyang anak nga bisaya editor usab nga si Mar Manus Junior.

Sa 'lapyo pa ang mga dahon' ang titulo sa iyang duha ka libro,

mga hinipusan nga bahandi agig handumanan para sa iyang mga apo;

tanang matang sa natad sa pagpanulat nga gipangpatik makita didto,

maong hangtod sa museo sa usa ka unibersidad sa sugbo, giila iyang talento;

tungod si lolo bisan wala'y grado, mas halangdon pa kaysa sa mga edukado.

Wala intawon katiwas sa pag-eskwela, tungod sa kalisud sauna,

bantay sa kabaw ug sa gamay'ng payag magpakatay ug paliya;

hangtod sa pagsawop sa adlaw, balak pwerte nang daghana,

maong sama sa dahon, paningkamot sa eskwela samtang lapyo pa,

kay kun muabot ang takna nga kita malawus ug mangatagak, andam ta.

Tagsulat:

Mrs. Flordeliza Sorono-Gagani

Basak Iba, Lapu-Lapu City

Magtutudlo, USC BED - SC