Ang Dinihogan

CEBU, Philippines - "Ug sa dihang gipakatawo ka na aron matuman ang Kasulatan, ang lingin namong kalibutan midis-og padung sa imong hayag nga langit. Mitalibud ni lagbas sa kangitngit, mituyok daw kasing simpig sa nabatunang bag-ong kahayag."

Niadtong gabii sa wala pa ikaw mahimugso, ang taho sa imong pagsingabot napasapasa na pinaagi sa mga mananap. Tugob sa kamaya nga nanabi ang mga abukay ngadtos mga periko. Ingon man ang mga balentong ngadtos tuki. Ang mga tukmo ngadto sa mga punay. Ang mga wati ngadtos halas. Bisan ang banog mipadaplin sa iyang pagtusik sa himungaan. Busa ang himungaan nakapanabi ngadtos pabo. Ug ang pabo ngadto sa tanang nahisakop sa kwadra.

Matuod gayud nga may dalunggan ang yuta, may pako ang balita. Kay matag hayop nakadungog sa maong taho: ang alindahaw, ang pawikan, ang lumod, ang bakasi, bisan ang mga tatlong, hulmigas, anay. Ang maayong balita milalin lukop sa kawanangan og gidala kini sa hangin tuyok sa kalibutan.

Samtang ikaw naghuwat diha sa kangitngit, imong gagmitoy nga tuhod gatikungkong sangko sa imong suwang, ang Kalibutan ug ang tanang naggimok niini kauban ang Adlaw ug ang Buwan miaringkil sab diha sa ilang gibitayan. Matag usa andam nga motimbaya, mosugat sa unang gutling sa imong pagsagol unya kanamo.

Ug sa dihang gipakatawo ka na aron matuman ang Kasulatan, ang lingin namong kalibutan midis-og padung sa imong hayag nga langit. Mitalibud ni lagbas sa kangitngit, mituyok daw kasing simpig sa nabatunang bag-ong kahayag.

Sa adlaw sa imong pagkahimugso, kining kusog nga nagtaral sa kalibutan aron malansang kini diha sa walay kalansangan, mikupot usab kanimo susama kahugot sa gibuhat ni Yochabel kang Moises sa dihang nagdumili siya pagtugyan niini sa diyos-diyos sa suba sa taga Ehipto. Nunot niini ang pasalig nga dili ug dili ka gayud mag-utaw-utaw pahilayo sa imong katawhan nga hagbay rang nanagtukaw.

Samtang sa kapunawpunawan, ang naglagiting nga Adlaw mihukad sa higante niining mga dila sa kalayo, aron magdilaab sa kahayag ang imong langit. Gikan sa banagbanag patighug sa sawumsom.

Wala papiri ang Buwan. Kay sa dihang nahiabot kaniya ang kahimatngon sa imong pagkahimong susama kanamo, mipaambit siya sa iyang hinuwamang dagitab. Ug siya sab misaad nga hatdan ka niyas iyang tibuok nga pahiyom matag bulan, bisan ikaw makabiya na niining pasungan.

Sa laing bahin, si Polaris, ang Labing Dakong Bitoon sa Amihanan, mikaging sa iyang gibarogan. Giugbok isip timaan, isip giya sa Tulo ka Maalamon, ihatod niya sa nataran sa Belen-Efrata aron moyukbo sa imong atubangan kauban ang mga magbalantay sa karnero, mga serapin, mga kerubin. Dili na gayud siya iwit nga lungsod!

Unya ikaw nakadungog sa among mga tingog nga nanag-ambahan. Batid ka sa among mga tingog bisan sa bagang panon. Bisan sa kalinghod sa imong pandungog, imo kaming gipaminaw. Nakaila ka dayon kanamo. Kay imo man kami sukad pa niadtong adlawa nga kami gipanamkon.

"Maayong pag-abot sa lingin namong kalibutan, Mesiyas namong gipangindahay," mao ni unod-uyok-dugo sa among mga saloma nga ginuntan sa pagbagting sa mga lingganay.

"Nagmaya kaming Makasasala sa imong pag-abot. Maayo nga ani-a ka na gayud!"

Tinagik ni  Eleanor E. Valeros Dibuho ni  Ramesh Rosillo