Kalambuan sa dakbayan kalampusan sa katawhan

Dili nato malikayan

Nga molingi sa kagahapon natong tanan

Linghod pa sa atong malantip nga alimpatakan

Ang kaniadtong panagway

Sa halandong yuta sa Naga nga karon dakbayan

Sa wala damha, nakab-ot na

Ang pinakataas bahin sa atong tingusbawan

Saksi kita sa kinabuhi

Susama sa hulmigas nga pagpakabuhi

Bisan pa, wala kita mawad-i

Sa paglaom, ang adlaw mo haom kanatong Nagahanon.

Kitang tanan mao kaniadto

Ang hulagway sa Naga ko.

Tuod man ang mga kausaban

Nag agad sa ligdong tuyok sa kalibutan

Walay bisan kinsa

Ang makasulti sa dangatan

Kung kini makapaunlod sa kada balatian

O pagsibog paingon sa pagka mauswagon

Apan kung unsa ug kinsa kita kaniadto

Maoy naghatag ug mabulokong kinabuhi

Sa tanang Nagahanon karon.

Dako na ang kausaban

Lakip na ang kalikupan

Tungod sa mahait nga alimpatakan

Sa mga nangamahan kanatong tanan

Alang sa kasiguruhan ug kalambuan

Nahulma tungod sa atong naagian

Lantawa ninyo mga Nagahanon

Tungod sa lig-on natong panon

Uban sa mga tawo naghatag

Kanato ug kaugmaon

Naani nato ang pagkamabungahon.

Mapasigarbuhon sa tibuok kalibutan

Ang indostriya, agrikultura, imprastraktura ug

Ekonomiya

Mga haliging lig-on sa dakbayan sa Naga

Usa sa mga haliging gitugyanan

Ang edukasyon maoy pultahan

Aron kita magiyahan

Sa maong pagpalig-on

Kita nakabaton sa maalamon

Ug mapuslanong mga batan-on

Tungod kay ang kaugmaon

Mao man kami karon.

Karon mga nagahanon

Unsa pa ang wala nato maangkon?

Ang kalisod sa unang panahon

Dugay nang nahulipan sa pagkamalambuon

Ato nang nabati ug nasinati

Ang pag uswag sa kinabuhi

Nga dugay na natong gimithi.

Ug unsa kita karon

Bunga sa pagtambayayong

Sa kada banay nagpahiyom

Labaw sa tanan ang paghigugma

Sa Diyos makagagahum.

Dinhi sa halapad kung dughan

Ug mahait kong alimpatakan

Akong gihangop ang makugihong katawhan

Ug isip ganti sa tanan, ang kalambuan sa dakbayan, kalampusan sa katawhan.