Ayaw

Miabot na usab ang gikahinaman sa mga katawhan

ang pagsaulog sa adlaw sa kapistahan sa Batang Balaan
saulog diri saulog didto ug saulog sa mga kadalanan
aron pag-ampo ug pagdayeg mahalad lang.

Mabulokong talan-awon ang makapadani sa atong mga mata
huni, tambol ug syagit ang atong madungog ug makita
ug isayaw sa usa ka babayeng maanyag ang Balaang Bata
inubanan sa pagngisi o katawa gikan sa iyang baba.

Mga langyaw, bisita ug higala niabot na
aron sa pagsaulog ug pag-ampo ubanan kita
bisan pa man sa init ug ulan wala kini nila panumbalinga
ingon niana Siya ka importante sa matag usa kanila.

Matag pundok sa katawhan dayag nga kalipay
minarkahang sinina nga tapot sa lawas ang atong makita
matag hangad sa hugay, hulagway sa Balaang Bata ang gibitay
matag huyop sa hangin kini ipalid-palid ug isayaw-sayaw.

Kitang tanan magpasalamat sa Batang Jesus
kay kita iyang giagak gikan sa kasakit ug kalisdanan
isayaw, isinggit ang iyang ngalan   sa tibook kalibutan
ug unta maghari ang iyang gugma ug kalinaw.