Dan-Ag

Dibuho ni Ramon Taguchi

Ikaw ang naghatud kanako niining kalibutan,

Imong giamuma, gigiyahan ug giampingan,

Mga sugyot ug tambag bout mong ipatuman

Aron sa akong paghamtung ako ligdong o boutan.

Isayaw, itabyog, pikpikon aron lang makatulog,

Sa panahon sa kagabhion imo akong gakson ug idulog,

Ug sa matag purwisyo imo akong alam-alaman

Tungod sa basa kong lampin nga kapugaan.

Ang gugma mo way kinutoban ug sama sa adlaw

Nga kanunay nagdan-ag ug misilaw,

Bisan paman sa pag-abot sa ulan ug sa bangaw

Moabot gihapon ang takna nga kini mogimaw.

Siyam ako kabulan sa imong sabakan,

Matag lihok,patid, imong paga-atangan.

Kasakit sa paghimugso imong gipangandaman

Aron masud-ong lang ang kahayag niining kalibutan.

Di ko ikaw mahimong ibaylo sa tanang butang,

Ikaw akong ipasigarbo sa tibuok kalibutan.

Pag-pangga ug gugma imong gipatagamtam.

Salamatkay ikaw ang dan-ag sa hayag kong dalan.