Torta ni Noy Aldo

Daghan ang mitumaw nga brand sa torta. Matag usa nilang nanag-iya miangkon pinaagi’g branding nga ilang torta maoy original. Mag-unsa na man lang kang Noy Aldo ani? Nga karaan pa man ni siya’s kampanaryo sa Parokya ni San Miguel.

“Exag [exaggerated] pod ka woi,” dagpi ni Alix. “Mao pa may pagka-senior citizen anang Noy Aldo nya moingon na ka’g karaan pa’s kampanaryo?”

Pasulabi ra god tong istoryaha. Pasobrahan ba. Apan ang buot nakong ipasabot nga nakasimba si Noy Aldo sa buhat sa iyang kaliwatan nga gipakatawong gikaluhaan na daa’g hulmahan, pugon ug sarangan sa torta. Busa, mao pay paghaw-as ni Noy Aldo tingali sa andador, nagmasa na siya’g mga sagol sa torta.

Naghungithungit na’s mga hulmahan ngadto’s baba sa pugon ginamit ang daw bugsay nga kahimanan. Kay iyang kaliwat may nakauna pagpamuhat ana dinhi, pwes napahiran gyod si Noy Aldo sa katakos mangluto og torta. Ug naa niya ang orihinal nga resipe.

“Unsa may karaan gyod diay nga resipe, Yang? Di ba mao ra man nang tanang giandam? Basic ra man na – margarine, harina, pula sa itlog, evaporated milk, tuba para patubo, ug ang mantika sa baboy,” batbat ni Alix nga gikuyogan sa pagtudlotudlo sa mga sangkap nga gihan-ay diha sa talad alang sa “Sangka sa Kaha” nga gipasiugdahan sa Cebu Parklane International Hotel. Friendly cook-out ra ni pero P5,000 sab ang premyo ug ang mananaug may kahigayonan nga makatungtong sa Parklane ug sa linawas mag-demo didto sa pagbuhat og torta atubangan sa mga turista. Pagka-bulahan! Kun si Noy Aldo kaha nga labihan ka maggiuwawon, makatingog pa kaha ni atubangan sa mga guests? Nah! Basin matikoy ni sama’g tortang wa kabukad. Higayon na unta niya ni kay ang Parklane buot man nga suhiron tanang lugar sa Cebu ug masinati ang kapanulundan niini sa habig sa pagpangluto. Isunod kuno nila ang pintos ug budbod kabog sa Norte.

Wala man tinooray nabag-o sa mga sagol. Ang pula sa itlog sayod na man ang kadaghanan nganong gipangitaan og pamaagi nga magamit ni. Kay lagi sa panahon sa Katsila, kadtong sige sila’g tukod og simbahan gamit ang bato as parehas. Maayo unta’g naa nay migamit og tuba nga sinambogan kay makaingon ta nga ang migamit sa tuba nga pure mao ang winner kay iyang resipe original,” matod na sab ni Alix. Ug gilista na gyod niya ang pamaagi sa pagluto sa Argao torta basi sa iyang nadunggan sa gipahigayong demo sa Argao Nature Park.

Huwata rong taudtaod kay si Noy Aldo ray angayan mangangkon nga orihinal.

“Kumoton gyod diay?” Nahingangha si Alix dihang gisugdan na sa Contestant No. 2 ang pagkumot sa margarina ug asukar.

Hahay ning babayhana! Unsaon man pagkahimo anang kinumot nga torta kun ato ra nang tutokan. Ug labaw pang gamitan og mixer, wa gyod na kumota. Gilahogay na na.

“Giugay? Gikumot na giugay pa?” Ambot og gituyo ba niya nga magbinuang o magpabuangbuang. Apan migilaw ang iyang mata dihang ang gatas gibubo ngadto sa margarina ug asukar. Ug gihunawan kini ni Noy Aldo. Padayon sab si Noy Aldo pagpasabot sa pamaaging kinaraan nga gikalawat niya’s iyang mga ginikanan.

Gilahogay. Gisagolsagol ug giukay. Gisunod paghuwad ang tuba nga lina. Tam-is kay bag-o pa ning sanggot. Gikan pa gyod sa punoan sa lubi ug dili mahimong mataud-tauran kay moanam na ni’g kaaslom.

Ang matang sa harina? Wala gyod sulayi ni Noy Aldo pagpasabot unsa ning matanga sa harina ug unsa pay gisagol nga nakapabungkag sa mga tibugol ug nakapahimo sa inumol o minasa nga andam na alang sa itlog ug mantika sa baboy. Sekreto kuno. Di mahimong ibulgar kay basin og sundon. Ug mipahiyom si Noy Aldo. Mahal ra ba kaayo ni’g pahiyom. Nakaatol gyod ko.

Dugay ang pagpatubo sa batter. Upat ngadto sa lima ka oras. Apan dali man lang ang pagluto. Bale’g kinse minutos lang ug matilawan na ang gipanghambog sa Argao. May sagol nang pasas, gipaibabwan og keso human kawisik-wisiki og asukar. Kataw-anan lang kay ang asukar gisulod sa plastik nga botelya sa Ajinomoto. Maayo unta’g dili masagulan og vetsin. Mao ra ra ba nang sinugdanan – tubo.

“Aw! Lami lagi sa? Pero mas lami kuno kun magkadugay. Mao diay ang catchphrase: Imbis nagkabahaw, nagkalami,” matod pa ni Alix nga nagkisapkisap na’s baba.

Tan-awang kanahan, ganina ra’g inusap sa torta wa pa gyod kahuman. Ug nag-atang pa’s bag-ong gimugna ni Noy Aldo. Kay lagi gipanghingusgan naman ang innovations sa torta, butangan na sab kuno ni og Argao Guilang’s Tableya shavings for toppings. Hala no? Kun mao, kanus-a pa man kaha ni mabusog bayhana? Eating without knowing! Hmmm…