Eleksiyon

Lapu-Lapu City Dibuho ni Ramon Taguchi

Eleksiyon, piniliay, bugno’ng lugaynon,

Nagkaduol, hapit na usab ipahigayon.

Nagkara-kara na’ng mga magapili,

Iyahay na’g kisaw kay magpasubli.

Nanimaho na gayud ang piniliay,

Nagkadaiyang dapit gipaskin na’ng mga dagway.

Sa mga magpapili ug magpasubli,

Mapasundayag sa lungsod, nga ilang gipakahari.

Mag nag-arkila og mga trumpa,

Aron matugtug ang ilang mga sonata.

Nga mopahinumdum sa mga pumipili,

Nga sila aduna’y katakus ug hamili.

Bisan unsa’ng kalihukan ilang paluyuhan,

Andam ug tagana nilang gastohan.

Aron lang nila mapadaylang,

Mapakita ang kaugalingon sa katawhan.

Laing timailhan mao,

Ang wala’y puas nga pagbubo og kaayuhan wala’g tuo.

Bisan ilang ipangulipas nga kini wala’y kalabutan,

Sa ilang pagpapili ug pagdagan.

Mga proyekto’ng wala unta kinahanglana,

Sama sa mga dalan nga maayo pa.

Gituyo lang gayud og guba,

Aron ayohon lang sab, aduna’y ikapakita.

Kaniadto ang mga tawo nagsige og hangyo,

Kadalanan intawon ayuha, ma’oy bakho.

Yam-iran lang, lingiw-lingiwan,

Kay wala kuno’y pundo ang panudlanan.

Apan karon hapit nalang hagkan,

Ang mga tawo nga niadto ilang gitalikdan.

Kay nagkaduol naman ang adlaw sa panudya,

Makuha lang ang boto, nga katuyuan nila.

Hinaut sa umaabot eleksiyon,

Dili kita magpaulog-ulog ug magpakaulipon.

Niining mga pulitiko nga mapahimuslanon,

Ang gitan-aw ra ang ilang mga kaugalingon.

Atong pilion kadtong mga may katakus,

Ug dili kanang sige lang og panghiyugpus.

Kadtong aduna’y balatian,

Alang natong kadaghanan.