Kilom-kilom na sa akong pagmata
Usa ka ubos nga naglupad-lupad ibabaw sa lampara
Sa may kwarto nag-alirong sa nag-inusarang suga
Karon usa, unya duha, laing usa unya nanaghan na.
Malipayon silang nanaglupad-lupad, nanagsayaw-sayaw
Kalipay sa daw talagsaong kahayag gibugtaw
Dili nila gusto nga sa mangitngit nga gawas sila ibugaw
Ang kahayag sa sulod ang naghatag nila’g hudyaka
Unta dili hikawan ang hamubong pagmaya.
Ang kahayag sa suga kanila nanagdani
O suga, ang imong kahayag kanila ayaw ikuli
Dili sa matag panahon sila nagdugok ug namili
Bisan sa karung panahon lang intawon
Aron sila padayong magmalipayon.
Kini na ang inyong higayon, mga pako inyong ikapakapa
Unta dili kamo palayason ngadto sa gawas ning balaya
Aron sa hawan maghimo’g daub hinoon
Ug dayun agnihon sa inyong hinanaling kamatayon.
Mortal nga nilalang, malooy ka ning ubos mong ulipon.