Kinabuhi

Nagsugod ang kinabuhi sa natisok na sa sabakan,

Aduna'y nalatid nga kapalaran ning kalibutan;

Dili matag-an kung may nagpaabot nga kaayuhan

Lain-lain pagalaktan ug pagadulngan nga dalan

Base sa kasinatian ikaanggid sa balod sa kadagatan;

Kinabuhi pagkalisod tugkaron kong utingkayon.

Kahagip-ot ug kahapsay man,ang tanan alimahan;

Kay maoy nahipatik sa listahan sa atong Amahan,

Bisan gidasmagan sa dagkong bul-og sa balod

Motiwhakaw bisan nahimutang kini sa lawod;

Aron sa lawas mogitib ang kadasig ug kabaskog,

Maningkamot gayud mobarog sa pakigbisog

Pagkapait handumon sa nanglabay'ng panahon,

Parehas sa kalubog sa baha kon aninawon;

Makapanghupaw man sa kakusog ug halawom,

Aron mahumpay'ng kahuot nga gibati sa ilawom

Dili panombalingon ang mapait nga naagian;

Bisan sa kasakit sa paghuhuna sa kasulbaran,

Isipon lang ang tanan nga walay nabatyagan,

Aron damgo sa kinabuhi adunay katumanan.