Edukasyon

Inday, Dodong, edukasyon ang labing unahon,

 Ang kalampusan, ginikanan mapasigarbuhon

Kini ra ang kabilin nga dili puyde'ng sakmiton

Kon dili sa pagpangita'g trabaho kini gamiton;

Edukasyon makab-ot kon adunay ambisyon

Kawad-on dili babag kon adunay determinasyon;

Inubanan sa pag-ampo ug pangaliya sa Kahitas-an

Aron panghunahuna magiyahan ug malamdagan,

Dili lamang igsapayan ang mga kalisod nga maagian

Kay kini hagit aron manlimbasog sa mga kakulian

Mosamot pa gayud ang kadasig sa pagpaningkamot

Ilabina kon kini giniyahan sa ginikanan aron makab-ot;

Pagkaanindot bation kon ang edukasyon natuman

Obligasyon sa ginikanan medyo nakuha-kuhaan,

Ilabina nakita na si Inday o si Dodong nga nipaso

Nagsul-ob sa tuga ug may diploma'ng giindorso;

Bul-og sa kalipay ang gibati ni Tatay ug ni Nanay

Nagtapok sa pagsaulog inubanan sa mga kabanay;

Nahimong ehemplo ang nakab-ot nga kadaugan

 Edukasyon sa kabataan angay gayud alimahan.

Giawhag ang kabatan-unan edukasyon hinuktukan

Aron ang pangandoy sa nasud adunay katumanan;

Panaghiusa usab sa katawhan ang gikinahanglan

Edukasyon sa tanan maoy paglaum sa kalambuan.