Singgit sa Kasing-kasing nga Nagmaya

Kun ugaling hikawan sa pagpadayag

Pagbati sa dugay’ng panahon gikalimtan

Pugson aron kanimo kini ikabutyag

Bisan kinsa, unsa dili babagan.

Babagan man kini sa higayon, 

Sa mga tawong walay katakos

Magpabilin kining lunsay sa gihapon

Magpaabot nga matinuoron ug tim-os.

Kasakit man ang mahimong bugti

Kalipay ang makab-ot sa kaugalingon

Kay kini ugaling ang paagi

Aron lunsay nga pagbati magmadaugon.

Sa panumdoman kini dili mahawan

Wala na kini sarang paingnan

Wala na kini sarang madunggan 

Sa alimpatakan ikaw buhing larawan.

Ang mga kaligotgot, kasakit, mahanaw 

Ang nahikatulog nga lawas, mabanhaw 

Sa katapusan sa kasakit, magmaya

Kay langit ug yuta, maghiusa.

Singgit sa kasingkasing nga nagmaya.