Pagbiya

Well it was dark. Neither of us could see, though we were laughing, which is what astonishment did to us —Michael Collier

Naglumba ug yawyaw ang mga 

zipper sa akong mga bag

murag wala kauyon sa akong gihungit kanila

apan ang ilang kabanha gilumsan sa

tunob sa imong tiil——

nag-asdang.

Sa imong pag-abot sa akong lawak

akong naaninag ang imong mata

nga nagsul-ob og daghang pangutana

wala pa gani ko kasulti og bisag usa ka pulong,

gitubag na sa imong nakita ang

kaugalingon.

Ang kagahapon,

magpabilin sa kagahapon

apan pwede gihapo’ng balikon:

Sa usab 

nanghipos na pud ang adlaw.

gilamoy siya sa kangitngit.

Ug wala na ta’y nakita.

Apan ang kagumkum sa atong katawa

nagpabiling tin-aw sa wanang

Sa gihapon,

Kini

gibuak sa ngilo nga agi sa zipper.

—Jessrel E. Gilbuena

  Santa Fe, Bantayan, Cebu