Mao diay

Nagtuo ako nga sa wala mo pagtubay, wala ako’y bili kanimo

Apan labaw ka pa diay nga daw bulkang gaantos tungod kanako

Kay gaping-it ping-it sa imong pagbating kabugwakon nag-alintabo

Hiniktan lang kini kay nagpangurat nga mangsaha ug di na mapuo...

Gasige ako’g paningil nga tugbangan ang gipakitang kaayo

Sa walay pagduhaduha o pagpanumbaling nga matulisok sa mga tawo

Kay nagmabalak-on sa pangagpas nga wala ra kadtong tanan para nimo

Apan utro ka usab diay nga nagpanikad nga tagbawon unta ako...

Gipadayag ko na tanan ko’ng kasagmuyong angay mong hinuklugan

Bahin kanako sa dihang anaa pa ako sa imong bugnaw nga kiliran

Kay ikaw ra ang gipangandoy ug wala nay lain pang makauban

Nga mamahimo ko’ng ibaylo sa tanan o kaha sa kalag magasahan...

Karon nga sipa mong gilitok daw dogdog ang hunghong mo kanako

Sa mga bulawanong- pulong duyugon niining tingkad nga dunggan ko

Wala na’y haw-ang pa niining buktong karon gasapnay nimo

Kay nagmatinud-anon ka, mahimayaong langit natumban ko...

Di mo gayud masayun-sayon pagpabati hugot mong pagpangga

Kay may binuhat kanang gipanumpaang gahinan sa tanang takna

Wala ka man bug-os nga nahigugma apan napahiluna siya og una

Mao nga gipadayon mo’ng barugan mga saad nga kamong duha gamugna...

Karon hisabtan ko’ng di mo dayun mabuhong akong mga yangungo

Mao nga dili na ako magbagutbot ug magkayokayo pa sa kasuko

Sa higayon nga kita magkinuptanay sadya nalang mangamuyo

Ug paningkamutan nalang masaw-an kalampusang gidamgo...