Unggoy-unggoy

Unggoy kong gamay

Gisugo ko’g kamunggay

Bantog nagdugaydugay

Nakabangal og sukmagay.

Unggoy kong dako

Gisugo ko’g tabako

Bantog nagdukoduko

Nakakita’g usa ka dako.

Unggoy kong nagkurbata

Hastang kawatana

Sa bahandi sa nasod

Nawani ang pirata.

Unggoy kong nagsotana

Halangdon kon magmisa

Na-isyu pagka-ugma

May kiha nga estafa.

Unggoy kong napriso

Mitunol og suborno

Bisag 57 ang napatay

Kalingkawas sa pagbitay.

Unggoy kong taga-media

Envelope-mental journalism tirada:

“Wa na’y libre rong panahona

Pamugas ra ning amo-a.”

Unggoy kong maestro

Sayop gipatik nga libro

Hakop sa tanang gahin

Sila-sila ray nagbahinbahin.

Unggoy kong huwes

Kunsabo sa pulis

Ebidensiya nga shabu

Nahibalik sa merkado.

Unggoy kong milansar

Nag-ihap sa napundar

Pagpa-aspalto natribukar

Mga proyekto nadelatar.