May nahimamat ako nga may-ong sa imong paminsar ug panagway
Gusto kong magpaduol apan lisod nga ang kamingaw kaniya ipabuhagay
Mao nga pugson ko kining kaugalingon kong kaniya mahilayo ug malikay
Aron dili na magbul-og og balik kining mga luhang kaniadto midagayday...
Gapanilap kining mga ngabil arun mga hawok mo subli kong matilawan
Gakurog kong kaunuran galisod sa paglihok samtang kanimo gasagbang
Layugon unta tika ug ipaabot ang init kong pagbating dili tinudluan
Apan basin sa kahugot niini, ikaw muipsot ug dili na gayud hikit-an...
Sa akong alimpatakan gusto kong ikaw makasinati sa tumang pag-antos
Arun sa mga nahiagumang kasakit ug kaparot musumbalik kanimo mutamparos
Apan bisan paman sa kadako sa akong tuyo ug tumong sa pagpanimawos
Kasingkasing kong mahuyang mao’y nagpabiling ulipon aron sa pagpaubos...
Samtang atoa ka sa halayo, ako gapig-it sa kahuot sa dughan ug kanimo gahanduraw
Matag takna sukad sa banag-banag sa kagabhiun sampak sa pagsidlak sa adlaw
Ako gahandom kanimo apan ang pag-atiman di mapagawas kay makauuwaw
Pun-an pa niining hilabihang kahidlaw nga sa gugma mo lang matagbaw...
Puy-an ko nalang ba kining bakak ug pagpakaarun-ingnon hangtod sa kahangturan?
Bisan pa man mao kini kanunay nga gahatag kanako sa tumang kagul-anan
O mugawas ba kaha ako ug hubuon ang maskara, makigharong sa tunglo sa katilingban
Ug isinggit kining pagbati’ng gitipig-tipigan nga sa dag-um sa kalangitan maoy tinubdan...
Gusto ko nang mupahuway ug ihangad kining akong suliran sa kahitas-an
Sa Halangdong Hari tua galingkod sa iyang balaang trono sa kapunaw-punawan
Apan wala ako’y igong kusog ug kaisog aron kining hungihong sa tentasyon matalikdan
Kay usa ra ako ka tawo, gabok nga binuhat sayon kupugon ug dali mapukan...