Gilatos ako sa bul-og sa huyop sa hanging makalanag
Gahangos nga gatungas sa dalan nga walay lakturanan
Sukad pa nga nakamatngon ning intap nga salabutan
Hangtod karung nahingkod ginukdanay way utlanan...
Mitagaktak lubog nga singot sa sawug nga kawayan
Anam-anam nga midagayday sa aping daling gitrapuhan
Apan may pipila ka lusok nangumpayot nangalak-angan
Mga luta niini gapabiling buhi sa akong panumduman...
Mga bagtak ko gipamaulan na sa paspas nga pagbaktas
Puypuy na kaayo kaanindot gayud untang ituy-od
Sa kada tumoy sa sapyaw kini ihuyatid ipangkaw-it
Aron matilawan nga kapahuwayang hingpit akong masakmit...
Abaga nangluyloy, nanggahi ug nagdaminghoy
Bunga sa mga suliran gipang-aswat gipangkapoy
Sa bungbong misandig, mipahiluna ug nagpanaghoy
Gilaay na unta apan padayung mikitoy-kitoy...
Hapit na mitikyaub tibuok kong kalawasan
Matang hikatulugon sa tukug pilok matukuran
Gusto ko nang piyungon isalig sa kahitas-an
Ang ugma niining uyamot, sa lumba walay kinutuban...