I
Natapos na ba sa Diyos pagbuhat ang kalibutan?
Kalibutan nga gipuy-an sa masalaypong katawhan
Sarang na ba ang atong pagtoo
Nga sa way kutas nga pagbag-o
Naangkon na nato ang tanan
Sanglit natubag na sa modernong teknolohiya
Ang tanan tang panginahanglan
II
Sulayi kuno pagtugkad ang tidlom nga tulukibon
Ang kalibutan wala pa mahuman sa gihapon
Daghan pang mga sapa sa kayutaan
Wala pa madugtong sa taytayan
Halapad nga minahan sa kasadpan ug silangan
Naghulat sa makugihong kamot
Aron mokintab ang daghan pang bulawan
III
Wala baya ibilin sa Diyos ang butang nga minugna nang daan
Ang kahanginan namungingi sa nagkadaiyang nota sa musika
Andam sakmiton aron maugba ang walay kamatayong obra maestra
Ang mga pulong laglom palandungon
Gituyo Niya paguhayguhay diha sa huna-hunang balaknon
Aron sa kapulihay matagamtam ta sa tim-os nga katagbawan
Paglitok nianang mga pasumbingay sa lumad tang pinulongan
IV
Ang kaikag sa mga batid sa arkeyolohiya nag-anam kainit
Mga nangalubong karaang dakbayan wala pa maugkat sa hingpit
Sila ang sarang mohatag og tubag sa ngiob tang kasaysayan
Unsay atong kaliwat, unsay atong kagikan
Yano lang nga tubag ang atong gitinguha
Natapos na ba pagbuhat ang kalibutan ni Bathala
V
Ang talikala nga naglatid sa hugaw tang huna-huna
Naghulat sa yanong tubag ning di tiaw’ng tanghaga
Katin-awan sa pangutanang tulukibon
Apan gipangahasan pagtubag niadtong nagpakaaron-ingnon
Tuig, bulan ug adlaw ang gitakda, kalibutan hingpit na kunong mawala
Apan nagpabilin kining matahom pagapuy-an
Bisan sa katalagman tang nahiagoman
VI
Dili baya hanap ang tugon sa Balaang Kasulatan
Ang kalibutan mohangtud sa kahangturan
Usa ka henerasyon ang ihatod sa kalimot
Laing henerasyon ang kanunay tang mapaabot
Atubangan sa daghanang sakripisyo nagpabilin bang lig-on
ang Kristohanon tang pagtoo
Tubag higala, tubag nga gikan sa imong galamhan
Natapos na ba sa Diyos pagbuhat ang kalibutan?