Sa wala palandunga, dakong garbo sa pamilya
Natuman ang dugay na nga gipangandoy
Nga mamahimong hingpit nga usa ka magtutudlo.
Apan dili sayon ang iyang tulumanon.
Sa halayong dapit unang nadistino,
Gi-asdang ang masuk-anong ulan,
kusu-kuso sa hangin ug nagbanig nga gabon
Bung-aw, lim-aw ug lapok gisagubang.
Usahay, tiyan nagkutoy, nagdagu-ok kay walay pamahaw
May higayon, mipahiyom bisan pa man sa panit manggunit
ang kainit sa adlaw dili igsapayan
Arun lamang mahidangat ug maka-alagad sa kabukiran.
Kay dakong kahinam makita ang mga pinalanggang tinun-an.
Adlaw ug gabii magpuga sa panghuna-huna
Wa taga-i og bili ang kakapoy ug kaapiki sa panahon
Ug itagana sa mahal nga kabuntagon
Ang mga buluhaton isip usa ka magtutudlo.
Kinahanglan sakto ang iyang karga
dili lamang sa pagpa-ambit sa kalantip sa huna-huna
Usab paggiya sa saktong dalan ug pag-umol sa maayong pamatasan
nga mao’y pinakadakong katungdanan ngadto sa mga tinun-an.
Magtubo sa atong panahon nga ligdong
Ug andam makilahutay sa tinu-oray nga duwa sa kinabuhi
Arun makab-ot nila ang dakong kahimu-ot
Sa giniknan ug katilingban.
Mao kini ang kinabuhi sa Magtutudlo
Labaw pa sa papel ni superwoman
Nagtakuban sa nagkadaiyang maskara
Sa tanang higayon iyang kaskas ug sayaw.
Kun kahimanan manlimbuwad
tungod sa kaluhag sa mga tinun-an
andam ang iyang tigib, martilyo ug lansang
kun may batang magsuga ang tuhod o mapi-ang
siya mamahimong mananambal
batuta sa kagubot kanunay’ng andam muowang
Usahay mamahimong pintor o dramatorga
arun pagtagad makuha ug sila mamati
Ug dili masayang may makat-onan.
Nga maoy lig-ong hinagiban nga ugma damlag
magamit bisan unsang suliran moasdang.
Lig-ong mubarog sa ilang mga tiil.
Makamaong mukapaykapay sa balod sa kapalaran
ug mamahimong garbo sa yutang natawhan.
Dili kalikayan miabot ang kabalaka
Usahay pamilya mahikalimtan
Tungod sa kahingawa dili matuman
Ang gipanaaran sa yuta ug Kahitas-an.
Bisan pa man sa mga kahigwaos nga gihambin
Tungud sa binulan nga dili kaigo,
Nangandoy nga ang iyang hinaguan may padulngan.
Mapasalamaton gihapon ug naglaum sa Langitnong Amahan
Nga sa kanunay hatagan sa yugo sa kabaskog
kalig-on, kapiskay sa panglawas
aron makalahutay sa pagkugos sa mga tulumanon
Bisan pa man sa iyang kaugalingong suliran
Nagpabiling malipayon, andam ug tagana
Muhatag sa iyang hustong pag-alagad
Musapupo sa mga nagkadaiyag batang
gitugyan kaniya sa mga ginikanan
bukas ang mga palad, sa walay pagbagut-bot .
Kining tanang pagsapnay, buhaton niya
Tungod ug alang sa dakong paghigugma
Kay nagtuo siya kining papil niya
usa ka dako ug sagradong gasa
Nga iyang gisapnay gikan sa langit
ug sa pagpadayon pagtuman sa kaakuhan
Isip ikaduhang inahan sa mga tinun-an.