Kaanugon lamang

Kaanugon lamang sa KINABUHI nga bililhon

Kun sa kaulahian sa kalayo ra diay mahiagom

Kay maoy gipasulabi ang yanang sa kasal-anan

Ug nagpahimulos sa kalipay nga gidulot ning kalibutan

Kaanugon lamang sa GUGMA nga tim-os ug tiunay

Kun sa kaulahian moani ra og pagmahay

Kay gitugyan diha sa binuhat nga mabudhi-on

Walay baruganan ug dili matinud-anon

Kaanugon lamang sa PAGSALIG nga gitugyan sa uban

Kun sa ulahi igo lamang kining pahimuslan

Sa mga tawo gituohan nga tinuod nga higala

Apan mapahimudsanon man diay ug tiglingla

Kaanugon lamang sa BAHANDI nga gihagoan

Kun sa ulahi ang ubang tawo mao ray mabulahan

Magdaginot ug maayo aron lang  makatigom

Apan dili ra ba madala ngadto sa kamatayon

Kaanugon lamang sa giampingan nga kaanyag

Kun sa ulahi mag-antus ra ang kalag

Kay maoy gipasulabi ang pag-atiman sa lawas

Ug nagpatuyang sa mga buhat na supak sa itaas

Kaanugon lamang sa mga PANINGKAMOT

Kun giliman sa mga pagpanglupig ug pagminaut

Kay dili gayud kini moani og kabulahanan

Kundili maoy magnudnod ngadto sa kapildihan

Busa magpakabuhi kita nga puno sa GUGMA 

Makigsuod sa Dios ug sa usa’g-usa

Huptan ang mga mithi nga putli, matarong, ug Diosnon

Aron ang tanan tang paningkamot dili maanugon