Ang gugma ni Jochebed ug Merris

Tulo ka gatos ka tuig human sa paghalin ngadtos laing kalibotan sa patriyarkang si Jose, may usa ka batang lalaki ang nahimugso sa Ehipto.

Alingisig ang iyang unang uha. Apan nasapawan kini sa bakho sa iyang inahan, kansang kasingkasing nanaglambod ang kalipay ug kabalaka.

Ang maong puya, kansang mga pinong tudlo nalukot ngadtos gamitoy nga kinumo ug nadaitol sa iyang dughan, usa ka maanindot nga bata. Gani, ikatulo kining gasa sa iyang sabakan. Wala siyay pagmahay sa Langit kay giuwan man siya’g panalangin.

Puno sa pagmahal, giisa niya ang gamitoy nga kinumo simpig sa iyang baba, ug daling nakatabok ang giiniton niini ngadtos iyang mga ngabil nga nanagkurog. Sa ingon, mikuyamang ang usa ka pudyot nga kalinaw sa iyang galamhan. Kay nagtoo man siya’g hugot sa laraw sa Ginoo. Walay daotang mahitabo sa iyang kamanghoran.

Ulipon tuod si Jochebed, apan naglatay sa iyang kaugatan ang kailhanan sa mga Levita. Usa siya ka babayeng nagsimba, nagpasidungog ug naghimaya sa Ginoo nilang Abraham ug Sarai, nilang Isaac ug Rebekah, Jacob, Raquel ug Leah. Nakasag-o siyas ilang mga sugilanon. Nagtoo siya sa mga gipangsaad sa Diyos kanila. Nga ang Ginoo sa kanunay magmatinud-anon.

Tungod kay gisaad man sa Ginoo kang Abraham nga mosanay ang katawhang Israelita sama kadaghan sa balas sa kabaybayonan, ang mga paraon nangahadlok nga moabot ang adlaw mapukan sila sa mga Israelita. Hangtod nga ang maong kahadlok naghatod sa pagpakanaog og kasugoan sa pagpatay sa mga bag-ong gipakatawong batang Hebreo. Maayo na lang gani kay ang mga Hebreohanong komadrona mahadlokon sa Diyos. Misuki sila sa maong kamandoan. Ilang gihimong katarongan nga kintahay mas kusgan ug baskog ang mga babayeng Hebreo itandi sa babayeng Ehiptohanon, busa makapanganak na dayon ang nahauna ug nga dili na nila maabtan pa ang bata.

Misamot kabalaka ang Paraon. Ang daan nang kurukuntong utok niini naningkamot pagpinsar na sab og mas mapintas nga sugo. Siksikon ang kabalayan kun duna bay bag-ong nanganak ug nga ang bata itugpo sa sapa sa Nilo – sarang matimo sa mga gipangguslang buwaya nga gipakasama nila’g diyos-diyos.

Busa, kabuhion og samot si Jochebed matag singgit sa mga inahang nailogan sa ilang masuso latas sa kampo. Mosamot kahugot ang iyang paggakos sa iyang anak taliwala sa pagkahinanok niini. Mas gihugtan niya ug sa iyang kapikas nga si Amram ang pag-ampo.

Tuod man, sulod sa tulo ka buwan, gitago nila ang masuso. Inabagan sa pagsabot sa ilang kamaguwangang anak nga si Miriam ug sa tres anyos nga manghod niining si Aaron. Apan sa pagtubo sa bata, naglisod na sila sa paglilong niini. Busa nakahukom si Jochebed nga kay buot ni Paraon itumod ang kapalaran sa mga bata sa sapa, nan pangunayan niya kini.

Sumala sa nahitabo kang Isaac, gihural ni Jochebed sa Langit ang kapalarang gilatid sa Diyos alang sa iyang anak. Nangabis siya’g sagbot (papyrus) nga mitubo sa sapa ug gilala kini ngadtos usa ka basket. Gibulitan niya kini (tar ug pitch) aron dili makatuhop ang tubig. Sa pagka-uga na, gihanigan ug gipahimutang niya ang nahinanok nga bata ug inubanan sa pag-ampo ug katapusang halok ug hapuhap, gipahid niya ang bul-og sa iyang mga luha. Nangamuyo nga unta kabahin sa laraw sa Labaw’ng Makagagahum ang pagpahiluna sa iyang anak sa mga kamot sa angayan ug matarong nga momatuto niini.

Kay dili man siya makaako sa pagnunot og tan-aw sa basket nga nahumol na sa suba, si Miriam maoy nagtanod niini. Nagsubaysubay intawon og unsay dangatan sa iyang manghod. Makuniskunis kaha ang bata sa mga buwaya? Mongaab kaha kini ug makalabnig pagtagad sa mga sundalo ni Paraon?

Samtang ang anak ni Paraon miabot sa tampi kay maligo, kauban ang iyang mga dama. Nasigpatan niya nga may butang nasangit sa mga sagbot diha sa sapa. Diha-diha, gimandoan niya ang iyang sulogoon nga haw-ason ang maong butang. Ug sa dihang naabli kini, misugat kaniya ang bag-ohay lang nahigmatang bata. Ang tabunong mga mata niini nakapalukmay sa iyang kasingkasing.

“Ang sapa mihatag kanako’g anak. Panggaon ko kini susama’g ako-a. Wala koy katakos moluwas sa tanang bata. Apan makapagaan kos pagbangotan karon sa usa ka inahan,” matod sa anak sa Paraon nga ginganla’g Merris.

“Pagatawgon siyag Moises – buot ipasabot gikan sa tubigan.”

Ug tuod man gipangga niya kini.