kadtong gabiing nanuroy ta
ug nahagbung ang mga bituon
sa akong mga mata,
sa dihang nisakay ta sa makalipong
nga ferris wheel nga perting kusuga
ang pagtungas ug dulhog,
nagpakilooy ko aron di ko mosuka
misutoy man hinuon ug padagan ang kanahan,
uban sab sa pagsutoy sa imong
mga kamot ngaris akong dughan,
misinggit kos kakuyaw sa
punay ug tuyok
sa atong gilingkuran giduyugan man sab
sa kakuyaw nga mituyok imong kamot.
murag galilo akong panan-aw
uban sa pagsinggit aron malagpot
ang mga kakulba nga kalugwaun na
sud sa akong ginhawaan, inay nga
imo kung alimahan sa akong kahadlok,
(kay lagi “first time”) imo man hinuong
gidungagan ang naghuot nga hangin
nga nagbalud balud sa akong tiyan.