Kay gabii naman

Gikan sa mga katigulangan imong nasunod tinuho-an nga kinaraan,

Sa matag kalihukan aduna kay regla nga ipataban;

Dili ka mopalit ug sudlay sa tindahan ni Eskarotan,

Ang imong katarungan KAY GABII NA MAN.

Sa imong kakugihan, kanunay nga limpyo ang inyong pinuy-anan,

Ang inyong nataran sa kahinlo mahimong kahigdaan;

Miabot ang kilomkilom silhig imong gitagoan,

Ang imong katarungan, KAY GABII NA MAN.

Sa nagkatol mong bagolbagol, ikaw mireklamo,

Ang imong ulo adunay lusa, kuyamad ug kuto;

Apan ang dangan nga midagsang imo lang gipasagdan,

Ang imong katarungan, KAY GABII NA MAN.

Ang bag-o mong sayal nasangit niadtong Domingo,

Lakip ang imong half slip natastas kay gilabnot ni Rico;

Ang naguhayfuhay mong sapot dili modayon kasorsihan,

Ang imong katarungan, KAY GABII GABII NAMAN.

Ang suki mong tindahan wa nimo malipay,

Panahon sa sueldo magtuhoy lang, maglikay-likay;

Ang giutang mo nga Kulapu dili mo una bayran,

Ang imong katarungan, KAY GABII NA MAN.

Sa imong pagpaugat si Sammy karon nagbagolbol,

Maayo pa kuno nga sa imong trabaho ikaw mapotbol;

Sa imong abilidad si Sammy karon natakdan,

Siya dili na pautang, KAY GABII NA MAN.

Kining mga kinaraan angay tang himo-an ug katapusan,

Walay mapaabot nga kauswagan kon sa pagtuo kita gibutaan;

Apan kon ang Pilipinhong pagtuo dili na gayod mabangbang,

Maayo pang wa nay gabii, ang tanan adlaw na lang.