Ayaw ko biyai

Usa ka gabii niadtong miduol ka kanako

Gaapong ka, gasunod-sunod sa akong luyo

Mao nga gipangutana ko ikaw, unsa ug ngano?

Ug dali kang mitubag nga aduna ka’y tuyo...

Giatubang ko ikaw aron

mapaminaw ko og tarong

Apan sa imong paglitok

daw dunay gahunghong

May hayag nga midan-ag sa

imong buotan nga nawong

Mao nga ako kanunay

nalang kanimo gahandom...

Sa imong mahigugmaong

panagway nga puno sa kasadya

Mga pahiyom inubanan sa kandiis,

daw langit naghudyaka

Sa pagtutok sa maanindot mong

gasidlak-sidlak nga mga mata

Ikaw nganhi sa akong kiliran

giatang- atangan ug gipangita...

Sa imong pangalan ikaw

akong gisukna sa makaduha

Ako hinayhinay mong

gisultian ug wala nagpanagana,

Bisan paman bag-uhay pa ug

pirmero pa natong panagkita

Maong karon ako daw gibayaw ,

nagmadasigon ug nagmaya...

Tungod sa kada adlaw natong

di maihap nga kumustaay

Panglantaw ko nausab ug sa

pagpanimpad ako nalipay

Natul-id na ang liko kong

dalang naandan nga gisubay

Kay ikaw miabot ug migiya

kanako aron kaugmaon mahan-ay...

Dili ka man motuo apan nahimo

kang kabahin sa akong pagkatawo

Ug mga pasalig mong sa tanang

oras andam ka nga naa para nako

Bisan hinigtan ka na sa laing kamot

ug kasing-kasing mo napriso

Apan ako gahangad, gapahipi ug

gahuwat hangtod nga lingion mo...

Milig-on atong panaghigalaay sa

punay natong binayloay og mga pulong

Mga tam-is mong saad maoy

akong gihuptan aron makapadayon

Sa akong mga paningkamot magpabiling mapaubsanon ug lindong

Aron sa katapusan sa natad sa gugma,

bangkaw ni kupido akong maangkon...

Wala ko damha nga muabot ka niining panahona sa akong kinabuhi

Mikalit ka pagbutho sa tungatunga sa akong kasakit ug pagkapildi

Mao nga karon nga anaa ka na ,

palihug lang pamati ug hinumdumi

Nga dili ko musugot magkalagyo pa kita,

mao nga ayaw ko biyai...