Mamugnaong taming inahan ko, gihigugma ko

Salamat sa imong walay puas nga pag-amuma

Ilabi na sa paghatag sa kaalam nga walay sama

Mga panahon nga gihalad mo kanako

Dili mabayran og salapi ug bisan unsang bahandi

Andam kang musabot sa tanang panahon

Bisan unsang adlaw, mapabuntag man o kagabhion

Nagpabilin kang inahan nga mapahiubsanon

Nag-inusarang takus sa tanang panahon

Taliwala sa mga kasakit nga gihatag ko kanimo

Wala nimo huna-hunaa ug nagpabilin ka sa imong pagkamaayo

Ikaw ang tinubdan sa akong kusog ug kalipay

Ang imong pagkawala posible kong ikamatay

Dako ang pagsalig mo sa Kahitas-an

Mga maayong gawi gipaambit mo sa tanan

Dili ko gayod mahikalimtan sa lapyahan sa akong dughan

Nga ikaw ang nag-inusarang nilalang niining kalibutan nga nagbilin kanako og maayong pagtulun-an

Matud mo ang kaalam usa ka bahandi nga dili mabayran

Ang labaw’ng gasa nga maipaambit sa usa ka ginikanan

Kay bisan pa man sa atong kapobrehon

Nagpabilin kang ligdong ug anaa sa matarong

Utang ko kanimo ang akong bililhong kinabuhi

Daw usa ka bahandi nga walay sukod nga bugti

Tungod kay dili ko ikalimod ang nag-inusarang kamatuoran

Nga ikaw nga inahan ko, gihigugma KO!