Mga Kaaway Gikan sa Fornax Science Fiction

“Unsa may atong tuyo niining atong biyahi sa kalibotan, sir?” nangutana and usa sa crew ni Mitaur.

“Taga didto and atong kagikan, mao kana ang poloy-anan sa atong mga katigulangan. Sige, manakay nata og ang tagsa-tagsa, sa iyang puwesto sa plataporma.”

Unya mihugong ang Mach 2. Milatas kini sa makusog nga silaw sa kahayag ug midal-os sa gikusgon sa panahon. Nakita sa radar sa Anderson Air Base nga nahimutang sa gamay nga isla sa Guam ang kahibulongang butang nga naglutaw sa kapunawpunawan. Gipalupad gilayon sa duha ka pilotong Amerikano ang duha ka F16 Phantom Jet.

Pila ka minuto ang milabay, nagungog ang tingog ni Air Force Captain Walt Knickerbocker sa computer screen.

“Base, base object identified! Object identified!”

“What is it, cowboy,” nangutana ang komandante nga si Bill Parham kinsa maoy nagmonitor sa radar screen.

“Sir, it’s a fuckin’ flying saucer.”

“Where the hell it’s headin’ Captain? It dissappeared on our screen.”

“It’s now sittin’ three miles off Talofofo.”

“Good. We’ll deal it later. Will you two proceed back to the base immediately?”

“Copy.” Human matubag ni Captain Knickerbocker and base, giradyohan dayon niya ang kaubang si Captain Dan O’Brian nga mosunod niya balik sa base.

Nakurat si Mitaur sa iyang nakita sa scree. Nakita niya ang mga hayop (mamal) naglakaw na sa duha ka tiil! Nahinumdom siya sa sulti sa iyang katigulangan nga sa milabayng 65 ka milyon ka tuig nagkamang pa sa yuta ang ilang matang nga gitawag og dinosaurs - ang unang nagpuyo sa kalibotan. Silang mga saurus intellectus lahi sa mga dinosaurs nga ilang katigulangan sanglit sila maoy direktang kaliwatan sa alasaurus, matud sa ilang katigulangan. Unom ka tiil lang ang ilang gitas-on kon itandi sa ilang higanteng katigulangan.

Lamang gitugahan sila’g salabotan nga dako pa kaysa higanteng mga dinosaurs. Apan tungod sa ilang kagamay, sayon ra kaayo silang puohon sa higanteng mga dinosaurs mao nga milalin sila ngadto sa isla nga gitawag og Atlantis.

Gawas sa ilang salabotan, ang mga saurus intellectus gituhahan sab sa kinaiyahan og kinabuhi nga moabot og pila ka milyon ka tuig. Apan ang ilang mga babaye manganak lang og usa sulod sa napulo ka gatos ka libo ka tuig.

Samtang didto sila sa Atlantis, si Centaur, ang ilang labing maayong siyentipiko, nag-imbento og usa ka matang sa makina nga maoy magdala kanila sa dinalian nga paagi ngagto sa laing planeta o kaha sa laing solar system kon may emerhensiya.

Usa ka adlaw niana, dunay higanteng tipak sa kawanangan. Usa kini ka silicon nga may sagol nga iridium nga makahilo sa ilang matanag.

Mibangga kini sa kalibotan. Miunlod ang Atlantis sa dagat sa kakusog sa pagbangga. Pipila lang ka saurus intellectus ang nabuhi.

“Napulog pito pa lang ako niadtong panahona,” nahinumdoman ni Mitaur ang sugilon sa iyang amahan. “Pila lang kanamo ang gisuwerte sa dihang gipadala kami sa imong apohan dinhi niining halayo nga galaksiya nga gitawag og Fornax pinaagi sa teleportasyon.”

“Unsay nahitabo sa akong apohan?” Nabuhi ba usab siya?” sukot niadto ni Mitaur.

“Wala. Namatay siya uban sa atong kaliwatan kay wala pay nahibalo kon unsaon pagpaandar sa makina nga mohatag og presyur nga mohimo sa solidong butang ngadto sa enerhiya para sa transmisyon.”

“Nganong wala man niya tudloi ang atong kaliwatan?”

“Bag-o pa niyang imbento ang makina og wala nay panahon sanglit duha ka adlaw sukad makompleto ang makina, ang higanteng silicon mibangga na sa kalibotan. Sagad sa mga buhing butang sa kalibotan nahilo sa silicon apil na ang mga dinosaurs apan kadtong gagmayng organismo, nabuhi. Og ako nangandoy nga moabot ang adlaw nga makabalik kita sa gigikanan tang dapit aron masusi ang hinigugma kong planeta.”

Tungod sa kakusog sa spaceship nga giluwanan nila ni Mitaur, wala makaapas ang duha ka Phantom Jet busa makatago sila taliwaa sa duha ka bukid diin sila mitugpa. Sa dihang naseguro nila nga namauli na ang duha ka Phantom Jet nga milutos kanila, mikontak dayon siya sa iyang superyor didto sa Fornax.

“Mayday! Mayday!”

“Usay balita?” tubag gikan sa Fornax.

“Gigukod kami og duha ka naglupad nga butang nga gipanag-iya tingali niining mga hayop (mamals) nga mihari sa kalibotan karon! Ambot nganong gigukod mi nila.”

“Ang inyong posisyon?”

“Nanago kamo sa duha ka pormasyon sa bukid taliwaa ning isla. Gikinahanglan namo ang inyong pag-alayon kay daghan ang mga kaaway!”

“Pila sila?”

“Minilyon! Makita sila bisan asa sa tibuok planeta!”

“Ayaw mo’g padayon. Abort mission!”

Mitulo ang luha ni Mitaur dihang misulbong ang Mach 2. Pagkaanugon! Ania na unta sila sa dapit nga diuyan sa miagi nilang kaliwatan apan daw dili na kini alang kanila kay gipuy-an na sa bangis nga mga hayop. ?