Harana sa Mangga

Sa among balay sa probinsya

Nagbarog ang bantugang mangga

Taas kaayo, lapas sa antenna

Nahimutang daplin sa eskena

Kung kalangitan mag-uwan

Kini makahatag og pasilonganan

Kung init, mapa-landongan

Mga dahon nga nagpong-pong sa punuan

Kung unsa kataas aning kahoya

Mao sad ang iyang pagsang-yad sa yuta

Daw mohalok sa dalang gi-abog

Ang iyang punuang bawog

Kini tibuok ug mamunga

Usahay aslum, usahay pwerteng tam-isa

Nig gawas sa sigpaw para sa mga bunga

Mga estambay nangayo og mga mangga

Ang dili makuhit, mahulog sa yuta

Mga pedicab driver magkabuang og kuha

Inig ka tagak sa sin malagobo

Kung panitan yellow pa jud kaayo

Kung magsakay ka og pedicab

Dili ka masaag ug mawala

Ingnon nimo “Noy, Tupas, Suba”

Katapusang eskena, kanang may mangga

Kini tuod kahoy ra

Pero apil na s’ya sa among pamilya

Tinanom ug inamuma

Niadtong unang panahon pa

Kami man mangamatay

Apan kini siya magpabiling liskay

Bagyo’g huwaw iyang maagi-an

Pero nagbarog gihapon ug gamhanan

Sa iyang paglungtad sa katuigan

Kini angay ikapasigarbo ug pakpakan

Kini dili lang tatak sa ka-abunda sa yuta

Pero sa gihatag nga gugma ug pag-amuma