Sa Akong Kasaypanan

Maisugon nga paghot sa irom-buang maoy nagtukaw kanako

Ginukuray sa mga iring, ilang mga tunob sa sin nga atop

Hagunos sa mga sakyanang nagsabay-sabay daplin sa dalan

Ug sa dughang galagubo- gikulbaan, sa kasaypanan ako magantihan...

Init man ang adlaw apan sulod kanako kusug nga uwan nahiaguman

Sa akong pagkadili makatarunganun ug nahimong mga kalapasan

Kay ako nagpaturagas, gapasagad sa akong dautang binuhatan

Karun nasugamak, nalubong sa lapok pwede na mabiay-biayan...

Wala man ako’y dapat basulon, sa akong mga tudlo punteryahan

Daghan ako’g gipambaylo ug gipang-ilisan, ako ra usab nga tinuyuan

Sama sa akong pinatud-a’g singot nga trabaho, akong inampingan

Tungod sa akong mga sayup, pagpabaya ako nakasab-an...

Pero usahay, dili man nako matudluan mamanduan ang akong gibati

Maglisod ako og pitol ug tuy-urun, han-ayon akong kinabuhi

Kay nabuwasot- nasulod naman ako sa laang sa dalang hiwi

Nga bag-o ra nako nasudlan, ako nakalitan murag gapanghasi...

Nagpanagana ako kay napakyas man ako sa akong buluhaton

Nahikalimot ako sa akong mga gipanumpaang obligasyon

Kay nalingla man ako sa kalipay’ng kalibutanon ug tawhanon

Wa ko igsapayan kay kadali, kasayon ug kamatintalon....

Maayo nalang unta wa ako mapukaw sa akong pagkahinanok

Bunga sa udtong tutok katumanan sa mga damgong’ maanindot

Kay karun na hinuon ako nahigmata, nakamatngon, gasud-ong

Natilawan ko kapildihan- kaparot, kasakit pamalandungon...